الماتىدا پروباسيا ەسەبىندەگى 35 سوتتالعان ازامات قالالىق سەنبىلىككە قاتىستى.
الماتى قالاسى بويىنشا قىلمىستىق-اتقارۋ جۇيەسى دەپارتامەنتى ناۋرىزباي اۋداندىق پروباسيا قىزمەتىنىڭ ەسەبىندەگى 35 سوتتالعان قالالىق سەنبىلىككە قاتىسىپ، 5 تونناعا جۋىق قوقىس شىعاردى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«ناۋرىزباي اۋدانى بويىنشا بارلىعى 240 سوتتالعان ەسەپتە تۇرسا، ونىڭ ىشىندە سوتتىڭ ۇكىمى بويىنشا 35 ادامعا ءماجبۇرلى ەڭبەككە تارتۋ جازاسى تاعايىندالعان. الماتى قالاسىندا وتكەن سەنبىلىككە وسى 35 سوتتالعان تۇگەل قاتىسىپ، ەڭبەك ۇلگىسىن كورسەتتى»، – دەيدى ناۋرىزباي اۋداندىق پروباسيا قىزمەتى ءبولىمىنىڭ اعا ينسپەكتورى ب.ورازوۆ.
پروباسيالىق باقىلاۋ قىزمەتىنىڭ ينسپەكتورلارى كۇن سايىن بەلگىلى ۋاقىتتا ەسەپتە تۇرعان سوتتالعانداردى تەكسەرە ءجۇرىپ، ولارعا بەلگىلەنگەن ءتارتىپتى بۇزباي جازا وتەگەن جاعدايدا مۇمكىن بولاتىن جەڭىلدىكتەردى دە تۇسىندىرەدى.