پرەزيدەنت تاپسىرماسىنا سايكەس الماتى قالاسىنا جاساعان ساپارى اياسىندا مەملەكەت باسشىسىنىڭ كەڭەسشىسى مالىك وتاربايەۆ ءبىلىم سالاسىنىڭ وكىلدەرىمەن كەزدەستى.
ءىس-شارا وقۋشىلاردىڭ يننوۆاسيالىق شىعارماشىلىق ورتالىعىندا ءوتتى، دەپ حابارلايدى aqshamnews.kz.
كەزدەسۋگە الماتى قالاسى ءبىلىم باسقارماسىنىڭ قىزمەتكەرلەرى، مەكتەپكە دەيىنگى جانە مەكتەپ ۇيىمدارىنىڭ وكىلدەرى قاتىستى. ولار مەملەكەت باسشىسى قاسىم-جومارت توقايەۆتىڭ ۇلتتىق قۇرىلتايدىڭ IV وتىرىسىندا بەرگەن تاپسىرمالارى اياسىندا اتقارىلعان جۇمىستار مەن الداعى جوسپارلار تۋرالى باياندادى.
اتاپ ايتقاندا، پەداگوگتەردىڭ كاسىبي دەڭگەيىن ارتتىرۋ ماقساتىندا جۇيەلى جۇمىستار جۇرگىزىلۋدە. بالالاردى وقىتۋ مەن تاربيەلەۋدىڭ جاڭا فورمالارى ەنگىزىلۋدە، اتا-انالارمەن جانە قوعامدىق قۇرىلىمدارمەن ءوزارا بايلانىس نىعايىپ كەلەدى.
ءبىلىم باسقارماسىنىڭ مالىمەتىنشە، مۇعالىمدەرگە ارنالعان 19 سەمينار-پراكتيكۋم جانە ءتۇرلى تاقىرىپتا 300-دەن استام جينالىس ۇيىمداستىرىلعان. وقۋشىلاردى جان-جاقتى دامىتۋ ءۇشىن تاربيە جۇمىسىندا زاڭعا، مەملەكەتتىك رامىزدەرگە قۇرمەتپەن قاراۋ، وتانسۇيگىشتىك پەن ەكولوگيالىق مادەنيەتكە باۋلۋ باعىتىنداعى ءىس-شارالار وتكىزىلىپ جاتىر.
ساباقتان تىس ۋاقىتتا وقۋشىلارعا اسكەري-پاتريوتتىق باعىتتا ءبىلىم بەرۋ، ۇلتتىق سپورت تۇرلەرىنە باۋلۋ، «جاس سارباز»، «Smart Bala» جوبالارى اياسىندا مەملەكەتتىك ورگاندارمەن بىرلەسكەن جۇمىستار جالعاسۋدا. سونىمەن قاتار، قالا مۇعالىمدەرى اراسىندا شىعارماشىلىق باعىتتاعى ءتۇرلى بايقاۋلار مەن ەستافەتالار ۇيىمداستىرىلۋدا.
ءبىلىم سالاسىنىڭ وكىلدەرى الماتىدا پەداگوگتەرگە قولداۋ كورسەتۋ جۇمىستارىنىڭ كۇشەيگەنىن اتاپ ءوتتى. قالا مەكتەپتەرىندە وقۋشىلار تولىققاندى ىستىق تاماقپەن قامتىلىپ، مەكتەپ اۆتوبۋستارى تۇراقتى جۇمىس ىستەۋدە.
ءوز سوزىندە مالىك وتاربايەۆ مەملەكەت باسشىسىنىڭ ۇستازدار ەڭبەگىن ءارقاشان قولدايتىنىن جانە بۇل باعىتتاعى ساياسات جالعاساتىنىن ايتتى.
– ۇستاز – ءارقاشان قوعامداعى مارتەبەلى تۇلعا. اباي اتامىز ايتقانداي: «ادامنىڭ ادامشىلىعى – جاقسى ۇستازدان»، – دەدى مالىك وتاربايەۆ.
پرەزيدەنت كەڭەسشىسى پەداگوگتەردىڭ قوعامداعى ايرىقشا ميسسياسىن اتاپ ءوتىپ، ولاردىڭ ەڭبەگى قازىرگى جانە كەلەر ۇرپاق ءۇشىن اسا ماڭىزدى ەكەنىن جەتكىزدى. ول ۇستازدار ەلىمىزدىڭ ادامي كاپيتالىنىڭ نەگىزىن قالىپتاستىرىپ جاتقانىن ەرەكشە اتاپ ءوتتى.
سونداي-اق، سپيكەر پرەزيدەنت ايقىنداعان باسىم باعىتتارعا – قوعامدى سيفرلاندىرۋ، كولىك-كوممۋنيكاسيا سالاسىن، ەنەرگەتيكا مەن اۋىل شارۋاشىلىعىن دامىتۋ قاجەتتىگىنە توقتالدى.
– بۇگىنگى تاڭدا ادىلەتتى قازاقستاندى قالىپتاستىرۋ ءۇشىن جاستارعا ساپالى ءبىلىم بەرۋ، مەملەكەتتىلىكتى، ەل بىرلىگىن جانە ازاماتتىق ىنتىماقتى ساقتاۋ – ماڭىزدى مىندەت، – دەدى مالىك وتاربايەۆ.
كەزدەسۋ سوڭىندا ول ءبىلىم بەرۋ سالاسىنىڭ قىزمەتكەرلەرىنە تابىس پەن شابىت تىلەدى.