الماتى قالاسىندا جول قوزعالىسى ەرەجەلەرىن ورەسكەل بۇزۋشىلاردى انىقتاپ، ولاردىڭ ارەكەتتەرىنىڭ الدىن الۋ ماقساتىندا جۇيەلى جۇمىستار جالعاسىپ جاتىر.
بۇل شارالار جاريالانعان "پروفيلاكتيكا جىلى" اياسىندا جول قاۋىپسىزدىگىن قامتاماسىز ەتۋگە باعىتتالعان. "سەرگەك" بەينەباقىلاۋ جۇيەسى ارقىلى وڭتۇستىك باعىتتاعى قۇلجا تاس جولىنىڭ رىسقۇلوۆ كوشەسىمەن قيىلىسىندا جول قوزعالىسى ەرەجەلەرىن ورەسكەل بۇزۋ دەرەگى تىركەلدى، دەپ حابارلايدى aqshamnews.kz Polisia.kz-كە سىلتەمە جاساپ.
اتاپ ايتقاندا، BMW كولىك جۇرگىزۋشىسى ءقاۋىپتى مانيەۆر جاساپ، دريفت ەلەمەنتتەرىن ورىنداۋ ارقىلى اپاتتىق جاعداي تۋعىزعان. پوليسەيلەر جۇرگىزۋشىنىڭ جەكە باسىن شۇعىل انىقتاپ، ونى جاۋاپكەرشىلىككە تارتتى. 21 جاستاعى ازاماتقا قاتىستى مانيەۆر جاساۋ ەرەجەلەرىن بۇزۋ، توتەنشە جاعداي تۋعىزۋ جانە ۇساق بۇزاقىلىق فاكتىلەرى بويىنشا اكىمشىلىك حاتتامالار تولتىرىلدى. سوت شەشىمىمەن ول 10 تاۋلىككە اكىمشىلىك قاماۋعا الىندى.
– ءاربىر جۇرگىزۋشى قالامىزدىڭ كوشەلەرى – جارىس الاڭى ەمەس ەكەنىن ءتۇسىنۋى ءتيىس. مۇنداي جاۋاپسىز ارەكەتتەر تەك زاڭ بۇزۋشىلىق بولىپ قانا قويماي، اينالاداعى ادامداردىڭ ءومىرى مەن دەنساۋلىعىنا زور ءقاۋىپ توندىرەدى. ءبىزدىڭ مىندەتىمىز – قۇقىق بۇزۋشىلىقتىڭ الدىن الىپ، قوعامدىق ءتارتىپ پەن جول قاۋىپسىزدىگىن ساقتاۋ. ەرەجەنى ەلەمەگەن ءاربىر ازامات زاڭ الدىندا جاۋاپ بەرەتىن بولادى، - دەدى الماتى قالالىق پوليسيا دەپارتامەنتىنىڭ جەرگىلىكتى پوليسيا قىزمەتى باسقارماسىنىڭ باستىعى سەرىك شۋمايەۆ.
بۇل جاعداي – قالادا جول قوزعالىسى مادەنيەتىن ارتتىرۋ جانە تارتىپسىزدىكتىڭ الدىن الۋ باعىتىنداعى شارالاردىڭ وزەكتىلىگىن تاعى ءبىر رەت دالەلدەپ وتىر.