الماتى قالالىق پوليسيا قىزمەتكەرلەرى ارنايى رەيد كەزىندە روزىباكييەۆ كوشەسىنىڭ بويىندا زاڭسىز ساۋدا جاساپ جاتقان تۇرعىنداردى انىقتادى.
تەكسەرۋگە نارازىلىق بىلدىرگەن ساۋداگەرلەردىڭ ءبىرى كولىكتىڭ استىنا تۇسپەكشى بولدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
وقيعانىڭ ۆيدەوسى الەۋمەتتىك جەلىدە تارادى. بەينەجازبادان پوليسەيلەرگە نارازىلىق ءبىلدىرىپ، اشۋعا بوي الدىرعان ايەلدىڭ كوشەنىڭ ورتاسىنا بارىپ جاتىپ العانىن كورۋگە بولادى. ءوز كەزەگىندە الماتى قالالىق پوليسيا دەپارتامەنتى روزىباكييەۆ كوشەسى بويىنداعى كوتەرمە بازار ماڭىندا ورنالاسقان ۇيلەردىڭ تۇرعىندارىنىڭ كوپتەگەن ارىز-شاعىم تۇسكەنىن ءمالىم ەتتى.
وسىعان وراي المالى اۋداندىق پوليسيا ءبولىمىنىڭ ۋچاسكەلىك پوليسيا قىزمەتكەرلەرى اتالعان اۋدان اكىمىنىڭ تاپسىرماسى بويىنشا جابايى ساۋدانىڭ الدىن الۋ جانە جويۋ ماقساتىندا رەيد جۇرگىزدى.
«قۇقىق بۇزۋشىلار اراسىندا 1962 جىلى تۋعان ا. ەسىمدى ايەل بولدى. ول پوليسيا قىزمەتكەرلەرىنىڭ زاڭدى تالاپتارىنا باعىنعىسى كەلمەي، جولعا جۇگىرىپ شىقتى. وعان قىتىستى اكiمشiلiك قۇقىقبۇزۋشىلىق تۋرالى كودەكستىڭ 667-بابىنىڭ ءبىرىنشى تارماعى بويىنشا اكىمشىلىك حاتتاما تولتىرىلدى»، - دەدى پوليسيادان.