وندا پوليسيا قىزمەتىن ساپالى كورسەتۋگە جاعداي جاسالعان.
پوليسيانىڭ قىزمەت كورسەتۋ ورتالىقتارىنان ازاماتتار بارلىعى 55 قىزمەت ءتۇرىن تەگىن الا الادى، دەپ حابارلايدى Almaty-akshamy.kz Polisia.kz-كە سىلتەمە جاساپ.
مەملەكەت باسشىسىنىڭ تاپسىرماسىن ورىنداۋ ماقساتىندا قالا اكىمدىگىنىڭ جوبالىق كەڭسەسىنىڭ قولداۋىمەن “قولجەتىمدى پوليسيا” قاعيداتىن جۇزەگە اسىرۋ ماقساتىندا الماتىدا پوليسيانىڭ قىزمەتتىك مودەلىن ەنگىزۋ جالعاسىپ جاتىر.
بۇعان دەيىن حابارلانعانداي، قالادا پوليسيا مەن قوعام اراسىنداعى ارىپتەستىك قارىم-قاتىناستى ورناتۋعا باعىتتالعان 8 زاماناۋي جانە جايلى پوليسيانىڭ قىزمەت كورسەتۋ ورتالىعى كەزەڭ-كەزەڭىمەن اشىلىپ كەلەدى. وندا پوليسيا قىزمەتىن ساپالى كورسەتۋگە جاعداي جاسالعان.
«بۇگىندە قالادا جەتى پوليسيانىڭ قىزمەت كورسەتۋ ورتالىعى جۇمىس ىستەيدى. ولار ازاماتتاردىڭ كومەككە جۇگىنگەن كەزدەگى شيەلەنىس پەن جايسىزدىق دەڭگەيىن تومەندەتۋگە، حالىقتىڭ پوليسياعا دەگەن سەنىم دەڭگەيىن ارتتىرۋعا، ازاماتتارمەن اشىق سەرىكتەستىك ورناتۋعا، قۇقىق قورعاۋ ورگاندارى قىزمەتكەرلەرىنىڭ جۇمىسىنىڭ تيىمدىلىگىن ارتتىرۋعا، ازاماتتاردىڭ سۇرانىستارىنا جەدەل دەن قويۋعا، حالىققا ۋاقىتىلى كاسىبي، بىلىكتى جانە كونسۋلتاتيۆتىك كومەك كورسەتۋگە مۇمكىندىك بەرەدى. پوليسيانىڭ قىزمەت كورسەتۋ ورتالىقتارىنان ازاماتتار بارلىعى 55 قىزمەت ءتۇرىن تەگىن الا الادى. ماماندار كوشى-قون جانە اكىمشىلىك زاڭناما ماسەلەلەرىن شەشۋگە، قۇقىق بۇزۋشىلىقتىڭ الدىن الۋعا، وتباسىندا زارداپ شەككەن ايەلدەردىڭ قۇقىقتارىن قورعاۋعا كومەكتەسەدى. ءبىز ءۇشىن ازاماتتاردىڭ تىنىش ورتادا قۇقىق قورعاۋ قىزمەتتەرى مەن قاجەتتى زاڭ كومەگىن الۋى ءۇشىن قولايلى جاعداي جاساۋ ماڭىزدى. تۇرمىستىق زورلىق-زومبىلىق قۇرباندارىنا كومەك كورسەتۋگە جانە جاسوسپىرىمدەر اراسىنداعى قىلمىستىڭ الدىن الۋعا ەرەكشە كوڭىل بولىنۋدە»، – دەدى الماتى قالالىق پوليسيا دەپارتامەنتىنىڭ باستىعى ارىستانعاني زاپپاروۆ.
سونىمەن قاتار ورتالىقتاردا پسيحولوگتار، مەدياتورلار، ىشكى ىستەر ورگاندارىنا وقۋعا جانە قىزمەتكە قابىلداۋ ءۇشىن كەڭەس بەرەتىن ماماندار، قارۋدى الىپ جۇرۋگە جانە ساقتاۋعا رۇقسات بەرەتىن قىزمەتكەرلەر جۇمىس ىستەيدى. ولاردىڭ ىشىندە رەسەپشن، كۇتۋ زالى جانە بالالار بۇرىشى بار. پوليسيانىڭ قىزمەت كورسەتۋ ورتالىعىنا كەلۋشىلەر قىزمەت كورسەتۋ ساپاسىن بەس بالدىق جۇيە بويىنشا باعالاپ، پىكىر بىلدىرە الادى. ورتالىقتاردىڭ جۇمىس ۋاقىتى – 9:00-دەن 20:00-گە دەيىن.