الماتىداعى پوليسيانىڭ سەرۆيستىك ورتالىقتارىندا 55 قىزمەت ءتۇرى كورسەتىلەدى
الماتى اكىمى ەربولات دوسايەۆ جۇمىس ساپارى بارىسىندا ناۋرىزباي اۋدانىنداعى پوليسيانىڭ سەرۆيستىك ورتالىعىنا باردى. ازاماتتاردى قابىلداۋ مۇندا 23 ماۋسىمنان باستالادى. مۇنداي ورتالىقتار بارلىق اۋدانداردا قالا اكىمدىگىنىڭ جوبالىق ءوفيسىنىڭ قولداۋىمەن قۇرىلادى. بۇگىنگى تاڭدا پوليسيا دەپارتامەنتىنىڭ بالانسىنا سەگىز ءۇي-جاي ساتىپ الىندى جانە بەرىلدى، ولاردىڭ التاۋى تولىق جابدىقتالعان جانە اشىلۋعا دايىندالۋدا.
«بۇل جوبا پيلوتتىق رەجيمدە مەملەكەت باسشىسىنىڭ تاپسىرماسى بويىنشا پوليسيا جۇمىسىنىڭ سەرۆيستىك مودەلىنە كوشۋ بويىنشا ىسكە اسىرىلدى، ونىڭ نەگىزگى ماقساتى – قوعاممەن اشىق ديالوگ جانە تۇرعىنداردىڭ سۇرانىستارىنا جەدەل دەن قويۋ. ءبىز ءۇشىن ازاماتتاردىڭ قۇقىق قورعاۋ قىزمەتتەرىن جانە تىنىش جاعدايدا قاجەتتى قۇقىقتىق كومەكتى الۋى ءۇشىن قولايلى جاعداي جاساۋ ماڭىزدى. تۇرمىستىق زورلىق-زومبىلىق قۇرباندارىنا كومەك كورسەتۋگە جانە جاسوسپىرىمدەر اراسىنداعى قىلمىستىڭ الدىن الۋعا ەرەكشە كوڭىل ءبولىندى»، - دەدى الماتى اكىمى ەربولات دوسايەۆ.
ورتالىقتاردا 55 قىزمەت ءتۇرى كورسەتىلەدى. ماماندار كوشى-قون جانە اكىمشىلىك زاڭناما، قۇقىق بۇزۋشىلىقتاردىڭ الدىن الۋ، وتباسىلاردا زارداپ شەككەن ايەلدەردىڭ قۇقىقتارىن قورعاۋ ماسەلەلەرىن شەشۋگە كومەكتەسەدى. ول ءۇشىن بارلىق جاعدايلار جاسالدى-ينسپەكتورلار مەن پسيحولوگتار قابىلدايتىن جەكە كابينەتتەر بولادى.
كوشى-قون پوليسياسىنىڭ ينسپەكتورلارى شەتەل ازاماتتارىن تىركەۋ نەمەسە قايتا تىركەۋ بويىنشا قىزمەتتەر كورسەتەدى، قازاقستان رەسپۋبليكاسىنان تىس جەرلەرگە كەلۋ نەمەسە كەتۋ، ازاماتتىقتى الۋ جانە تۇراقتى تۇرۋ ءۇشىن قۇجاتتاردى رەسىمدەيدى.
اۆتوكولىك يەلەرىنە جكو فاكتىلەرى بويىنشا كونسۋلتاسيالار بەرىلەدى، اۆتوكولىككە اكىمشىلىك ايىپپۇلداردىڭ، اۋىرتپالىقتار مەن شەكتەۋلەردىڭ بار-جوعىن تەكسەرۋگە، كولىك قۇرالىن قايتا جابدىقتاۋ جونىندەگى قۇجاتتاردى رەسىمدەۋگە كومەكتەسەدى.
ورتالىقتاردا زاڭگەرلەر، مەدياتورلار، ىشكى ىستەر ورگاندارىنا وقۋعا جانە قىزمەتكە قابىلداۋ جونىندەگى كونسۋلتانتتار، سونداي-اق قارۋ الىپ جۇرۋگە جانە ساقتاۋعا رۇقسات بەرۋ جونىندەگى قىزمەتكەرلەر جۇمىس ىستەيتىن بولادى.
ازاماتتاردى قابىلداۋدى ۋاكىلەتتى قۇزىرەتتى قىزمەتكەرلەر - تەرگەۋشىلەر، جەدەل ۋاكىلدەر، ۋچاسكەلىك ينسپەكتورلار جۇرگىزەدى. دەرەكتەر بازاسى قول جەتىمدى بولادى، بۇل بۇرىن بەرىلگەن ءوتىنىشتى قاراۋ بارىسى تۋرالى بىلۋگە نەمەسە جاۋاپكەرشىلىككە تارتۋ سەبەپتەرى تۋرالى اقپارات الۋعا مۇمكىندىك بەرەدى.
سيفرلاندىرۋ باسقارماسىمەن بىرلەسىپ زياتكەرلىك بەينەباقىلاۋ جۇيەسى جۇمىس ىستەيدى، ونىڭ كومەگىمەن جوعالعان زاتتى تاۋىپ قانا قويماي، قىلمىستى جەدەل اشىپ، قۇقىق بۇزۋشىلىقتى انىقتاۋعا بولادى.
ورتالىقتاردىڭ جۇمىس كەستەسى-ساعات 9:00-دەن 20:00-گە دەيىن. ساعات 23:00-گە دەيىن ۋچاسكەلىك پوليسيا ينسپەكتورلارى ازاماتتاردى قابىلدايدى. تۇرعىندارمەن تىكەلەي بايلانىستا بولاتىن بۇل قىزمەتتى دامىتۋعا قالا اكىمىنىڭ تاپسىرماسى بويىنشا ەرەكشە كوڭىل بولىنەدى.
بولاشاقتا ارحيۆتىك انىقتامالار مەن باسقا دا قىزمەتتەردى راستاۋ بويىنشا پوليسيانىڭ سەرۆيستىك ورتالىقتارىنىڭ فۋنكسيونالىن كەڭەيتۋ جوسپارلانۋدا.