الماتىدا پوليسيانىڭ ءبىرىڭعاي ساپتۇزەۋى ءوتتى، – دەپ حابارلايدى اlmaty-akshamy.kz.
الماتى قالالىق پد باستىعى ارىستانعاني زاپپاروۆتىڭ قاتىسۋىمەن پد اۆتوكولىك شارۋاشىلىعىندا بىرىكتىرىلگەن پوليسيا جاساقتارىنىڭ ءبىرتۇتاس ساپتۇزەۋى ءوتتى.
– پوليسياعا قازاقستان رەسپۋبليكاسى پرەزيدەنتىنىڭ، ازاماتتاردىڭ، اسىرەسە بالالاردىڭ قاۋىپسىزدىگىن قامتاماسىز ەتۋ، ولاردىڭ كونستيتۋسيالىق قۇقىقتارىن قورعاۋ، تۇرمىستىق زورلىق-زومبىلىقتىڭ الدىن الۋ، زاڭدىلىق پەن قۇقىقتىق ءتارتىپتى قامتاماسىز ەتۋ، جازاتايىم وقيعالاردىڭ سانىن ازايتۋ، حالىقتىڭ ساۋاتتىلىعىن ارتتىرۋ، كوشى-قون باقىلاۋىن كۇشەيتۋ، ەسىرتكى قىلمىسىمەن كۇرەسۋ، سونداي-اق جەكە قۇرام اراسىنداعى ءتارتىپ پەن زاڭدىلىق ماسەلەلەرى جونىندەگى تاپسىرمالارىن ورىنداۋ مىندەتى تۇر. سونىمەن قاتار جەرگىلىكتى پوليسيا قىزمەتىنىڭ ساپاسىن ارتتىرۋعا جانە العا قويىلعان ماقساتتارعا تيىمدىرەك قول جەتكىزۋگە ىقپال ەتەتىن قىزمەتتىڭ سەرۆيستىك مودەلىنە كوشۋ بويىنشا ىشكى ىستەر مينيسترلىگىنىڭ باسىم تۇجىرىمدامالارىنىڭ ءبىرىن ىسكە اسىرۋعا ەرەكشە نازار اۋدارىلۋدا. قالاداعى ءتارتىپ پەن ازاماتتاردىڭ اماندىعى پوليسيانىڭ قالاي جۇمىس ىستەيتىنىنە بايلانىستى. ءتارتىپ ساقشىلارىنىڭ قوعاممەن تىعىز بايلانىستا بولۋى وتە ماڭىزدى. ال ماتەريالدىق-تەحنيكالىق بازا مەن مەملەكەتتىك الەۋمەتتىك قولداۋ ولاردىڭ وقيعالاردان قالىس قالماي، قىلمىسقا قارسى تۇرۋىنا مۇمكىندىك بەرەدى، – دەدى ارىستانعاني زاپپاروۆ.
سونداي-اق پوليسيا دەپارتامەنتىنىڭ باسشىسى، ءاربىر پوليسيا قىزمەتكەرى ازاماتتاردىڭ قاۋىپسىزدىگى مەن يگىلىگى ءۇشىن ادال جانە رياسىز قىزمەت اتقارۋ كەرەكتىگىنە توقتالدى. وسى ورايدا ول ءتارتىپ ساقشىلارىنا جەكە قۇرام اراسىندا قاتاڭ ءتارتىپ پەن زاڭدىلىقتى ساقتاۋدى تاعى دا ەسكە سالدى. سونىمەن قاتار ءبىرتۇتاس ساپتۇزەۋ كەزىندە الماتى قالالىق پد باسشىلىعى پاترۋلدىك پوليسيا اۆتوپاركىنىڭ جاعدايىن تەكسەردى.