كۋرسانتتان گەنەرالعا دەيىن: الماتىدا العاش رەت پوليسەيدىڭ ءومىرى تۋرالى ميۋزيكل ساحنالاندى
Almaty Theatre-دا ىشكى ىستەر ورگاندار ارداگەرلەرىنە، پوليسيا قىزمەتكەرلەرىنىڭ قىزمەتتىك مىندەتىن اتقارۋ كەزىندە قازا تاپقانداردىڭ تۋىستارىنا، قالالىق پوليسيا دەپارتامەنتىنىڭ قىزمەتتەرى مەن بولىمشەلەرىنىڭ جەكە قۇرامىنا ارنالعان مەرەكەلىك كونسەرت ءوتتى. ءىس-شاراعا الماتى قالاسىنىڭ اكىمى ەربولات دوسايەۆ قاتىستى، دەپ حابارلايدى Almaty-akshamy.kz.
قازاقستان رەسپۋبليكاسىنىڭ مەملەكەتتىك ءانۇرانىن ورىنداعاننان كەيىن كونسەرتتىڭ شىمىلدىعى ءىىد وركەسترىنىڭ ورىنداۋىنداعى «گۇل الماتىم» كومپوزيسياسى جانە «سارمات» بالالار ۇجىمى مەن «سالتانات» بي ءانسامبلىنىڭ حورەوگرافيالىق قويىلىمىمەن اشىلدى.
العاش رەت ءتارتىپ ساقشىلارىنىڭ كۇشىمەن ءىىم اكادەمياسىنىڭ كۋرسانتىنان گەنەرالعا دەيىن ءبىر پوليسەيدىڭ دامۋ تاريحىن سومداۋمەن ميۋزيكل ۇيىمداستىرىلدى. سونداي-اق، كورەرمەندەرگە تەاتر نومىرلەرى بار مەرەكەلىك باعدارلاما ۇسىنىلدى.
الماتى ءوزىنىڭ ەرەكشە ءارى قايتالانباس كەلبەتىن ساقتاپ قانا قويماي، جىل ساناپ دامىپ، وركەندەپ كەلەدى. قالانىڭ جەتىستىگىنە، قۇقىق ءتارتىبىن قامتاماسىز ەتۋگە جانە قىلمىسقا قارسى كۇرەسكە الماتى پوليسەيلەرى دە لايىقتى ۇلەس قوسىپ وتىر.
«بۇگىندە الماتى پوليسياسى قىلمىسقا قارسى شابۋىلدىق كۇرەستى جۇزەگە اسىرۋ، قۇقىقتىق ءتارتىپتى نىعايتۋ جانە قالادا قاۋىپسىزدىكتى قامتاماسىز ەتۋ ءۇشىن بارلىق قاجەتتى جاعداي مەن مۇمكىندىكتەرگە يە. قازاقستاننىڭ ءتارتىپ ساقشىلارى – مەملەكەت پەن تۇرعىنداردىڭ قاۋىپسىزدىگىنىڭ كەپىلى. ءبىز قالا تۇرعىندارى مەن قوناقتارىنىڭ ءقاۋىپسىز ءومىر سۇرۋىنە جاعداي جاساي وتىرىپ، وتان الدىنداعى قىزمەتتىك بورىشىن ادال اتقاراتىن پوليسيا قىزمەتكەرلەرىمەن ماقتانامىز»، - دەدى الماتى قالاسى پوليسيا دەپارتامەنتىنىڭ باستىعى ارىستانعاني زاپپاروۆ.
سونداي-اق، كونسەرتكە «دوس-مۇقاسان» ءانسامبلى، تورەعالي تورەالى، ءمادي احمەتقوجا، ءال-ناسىر قاتىستى. مەرەكە «ابىروي» توبىنىڭ ورىنداۋىنداعى «رۋح» پاتريوتتىق انىمەن اياقتالدى.
بۇگىندە قازاقستاندىق پوليسەيلەر ىشكى ىستەر ورگاندارىنىڭ قۇرىلعانىنا 32 جىل تولۋىن اتاپ ءوتىپ جاتىر.