ش.شاياحمەتوۆ اتىنداعى «ءتىل-قازىنا» ۇعپو 2024 جىلدىڭ شىلدە ايىندا مەملەكەتتىك تىلدە كومپيۋتەرلىك ويىن ازىرلەۋشىلەر اراسىندا حاكاتون وتكىزبەك.
1-ورىن ءۇشىن – 3 ميلليون تەڭگە. بايقاۋ قازاقستان رەسپۋبليكاسىندا ءتىل ساياساتىن دامىتۋدىڭ 2023-2029 جىلدارعا ارنالعان تۇجىرىمداماسى اياسىندا جۇزەگە اسىرىلادى، دەپ حابارلايدى Almaty-akshamy.kz.
TIL-QAZYNA PLAYGROUND اتتى بايقاۋدا ۇمىتكەر كوماندالار ءوزارا ب ا ق سىناسادى. حاكاتوننىڭ ماقسات-مىندەتى – ويىن ارقىلى قازاق ءتىلىن ۇيرەتۋدىڭ تىڭ يدەيالارىن جيناقتاۋ، قوعامعا قاجەتتى قازاق تىلىندە كومپيۋتەرلىك ويىن ازىرلەۋ، سول ارقىلى مەملەكەتتىك تىلدە سويلەۋشىلەر سانىن ارتتىرۋ، ويىن دايىنداۋ سالاسىنداعى جاس مامانداردى ىنتالاندىرىپ، ولاردىڭ تىڭ يدەيالارىن ناسيحاتتاۋ.
سايىس شارتى بويىنشا سايىس بارىسىندا قاتىسۋشىلار گەيمديزاين، كومپيۋتەرلىك ويىن ءپروتوتيپى مەن دەمو نۇسقاسىن دايىنداۋى قاجەت.
كوماندالاردىڭ ءوتىنىمىن قابىلداۋ جانە تىركەۋ 2024 جىلدىڭ 18 ماۋسىم – 5 شىلدە ارالىعىندا جۇرگىزىلەدى. ىرىكتەۋدەن بارلىعى 5 كوماندا عانا وتەدى. بايقاۋ 2 كەزەڭنەن تۇرادى. 1-كەزەڭ – ىرىكتەۋ، 2-كەزەڭ – جەڭىمپازدى انىقتاۋ. ىرىكتەۋدەن وتكەن 5 كوماندا استانا Hub-تا وتەتىن وفلاين فورماتتاعى 2-كەزەڭگە شاقىرىلىپ، قازىلار القاسى الدىندا جۇمىستارىن قورعايدى. 1-ورىنعا يە بولعان 1 كومانداعا 3 000 000 تگ قارجىلاي سىيلىق نەمەسە جوبانى تولىق اياقتاۋ ءۇشىن ارنايى شارت جاسالادى.