ىشكى ىستەر ءمينيسترى جاريالاعان "پروفيلاكتيكا جىلى: پوليسيا زاڭ مەن ءتارتىپ كۇزەتىندە"، سونداي-اق "ەسەپتەگى تۇلعا" رەسپۋبليكالىق جەدەل-الدىن الۋ ءىس-شاراسى اياسىندا الماتى قالاسىنىڭ پوليسيا قىزمەتكەرلەرى باس بوستاندىعىنان ايىرۋ ورىندارىنان بوساتىلعان ازاماتتارعا الەۋمەتتىك-قۇقىقتىق كومەك كورسەتۋ جانە ولاردى جۇمىسقا ورنالاستىرۋ باعىتىندا جۇيەلى جۇمىستار جۇرگىزىپ جاتىر.
تەك تۇركسىب اۋدانىنىڭ وزىندە بۇل ءىس-شارا بارىسىندا ىشكى ىستەر ورگاندارىندا پروفيلاكتيكالىق ەسەپتە تۇرعان ءۇش ادام تۇراقتى جۇمىسپەن قامتىلدى، دەپ حابارلايدى aqshamnews.kz.
– بۇرىن سوتتالعان ازاماتتاردىڭ قىلمىسقا قايتا بارماۋى ءۇشىن ولاردىڭ الەۋمەتتىك قورعالۋى مەن قوعامعا بەيىمدەلۋى اسا ماڭىزدى. تاجىريبە كورسەتكەندەي، تۇراقتى تابىسى جوق ادامدار قىلمىسقا ءجيى بارادى. سوندىقتان ءبىز پروباسيا قىزمەتىمەن بىرلەسە وتىرىپ، جۇمىسقا ورنالاستىرۋ باعىتىنداعى جۇمىستاردى تۇراقتى تۇردە جۇرگىزەمىز. ۋچاسكەلىك پوليسيا ينسپەكتورلارى جۇمىسپەن قامتۋ ورتالىقتارىنا اي سايىن ەسەپتەگى ازاماتتاردىڭ ءتىزىمىن جولداپ وتىرادى. وتكەن جىلى وسىنداي شارالار ناتيجەسىندە 24 ادام تۇراقتى جۇمىسقا ورنالاسقان، – دەدى تۇركسىب اۋداندىق پوليسيا باسقارماسىنىڭ باسشىسى دۋمان اۋحادييەۆ.
سونىمەن قاتار قايتالاناتىن قىلمىستاردىڭ الدىن الۋ ماقساتىندا ۋچاسكەلىك ينسپەكتورلار پروباسيا قىزمەتىمەن بىرلەسىپ، ەسەپتە تۇرعان ازاماتتاردىڭ تۇرعىلىقتى جەرى بويىنشا كۇندەلىكتى تەكسەرۋ جۇمىستارىن جۇرگىزۋدە. – بۇگىندە اۋدانىمىزدا 318 ازامات تۇنگى ۋاقىتتا تۇرعىلىقتى جەرى بويىنشا تەكسەرىلدى. ناتيجەسىندە ءۇش زاڭ بۇزۋشىلىق انىقتالدى. ونىڭ ىشىندە ءبىر ازاماتقا ق ر اكىمشىلىك زاڭناماسىن بۇزعانى ءۇشىن حاتتاما تولتىرىلدى، ال ەكى ادامعا قاتىستى سوتتىڭ مەرزىمىنەن بۇرىن شارتتى تۇردە بوساتۋ تۋرالى شەشىمى جويىلدى، – دەدى دۋمان اۋحادييەۆ.
اقپارات كوزى Polisia.kz سايتىندا: https://polisia.kz/almatyda-politsiya-buryn-sottalghan-azamattardy-zhumysqa-ornalastyrugha-komektesti/