الماتىدا بۇقارالىق سپورتتى دامىتۋعا، اۋلا باستامالارىن قولداۋعا، قالا تۇرعىندارىن سپورت پەن بەلسەندى ءومىر سالتىنا كەڭىنەن تارتۋعا باعىتتالعان «سپورت – دوستىق الاڭى» قالالىق جوباسىن جۇزەگە اسىرۋ جالعاسىپ جاتىر.
جوبا ءتۇرلى الاڭدى قامتىپ، فلەشموب، تۋرنير، وتباسىلىق جارىس پەن الەۋمەتتىك-سپورتتىق ءىس-شارالاردى بىرىكتىرەدى. بۇل تۋرالى الماتى قالاسىنىڭ سپورت باسقارماسىنىڭ وكىلدەرى ايتتى، - دەپ حابارلايدى Aqshamnews.kz.
وتكەن دەمالىس كۇندەرى ءىس-شارا بىرنەشە اۋداندا ءبىر ۋاقىتتا ۇيىمداستىرىلدى. مەدەۋ اۋدانىندا جوبا اياسىندا جانە «تازا قازاقستان» رەسپۋبليكالىق اكسياسىمەن بىرلەسىپ ءىرى سپورتتىق فلەشموب ءوتتى. جاستار، وقۋشىلار، ستۋدەنتتەر، ارداگەرلەر مەن ەرىكتىلەر – جالپى سانى 700-دەن استام قالا تۇرعىنى سپورتتىق ويىندارعا، بي فلەشموبتارىنا جانە بەلسەندى باعدارلاماعا قاتىسىپ، ءىس-شارا ەرەكشە اتموسفەرادا ءوتتى.
المالى اۋدانىندا 1986 جىلعى جەلتوقسان وقيعاسىنا قاتىسقاندار اراسىندا ۆولەيبول ءتۋرنيرى ءوتتى. بەس كوماندا ەموسياعا تولى كەزدەسۋ وتكىزىپ، جەڭىمپازدارعا كۋبوك، مەدال جانە العىس حات تابىس ەتىلدى. ۇيىمداستىرۋشىلاردىڭ ايتۋىنشا، مۇنداي كەزدەسۋلەر ۇرپاق ساباقتاستىعىن نىعايتىپ، جاستاردىڭ سپورتقا دەگەن جىلى شىرايىن قالىپتاستىرادى.
تاۋەلسىزدىك كۇنى قارساڭىندا گاندي اتىنداعى ساياباقتا وتباسىلىق سپورت ەستافەتاسى ءوتتى. اتا-انالار مەن بالالار ءبىر كوماندا بولىپ ونەر كورسەتىپ، ۇيىمشىلدىق پەن كوماندالىق رۋح تانىتتى. جارىستا اسقاروۆتار وتباسى جەڭىمپاز اتاندى. بارلىق قاتىسۋشىعا العىس حات پەن ەستەلىك سىيلىق بەرىلدى.
اۋەزوۆ اۋدانىندا اسىق اتۋ، دارتس، شاحمات، ارقان تارتىس جانە ۆولەيبول ويىندارىن قامتىعان كەڭ كولەمدى سپارتاكيادا ۇيىمداستىرىلدى. ءىس-شارا تۇرعىندار اراسىنداعى دوستىقتى نىعايتىپ، جاعىمدى سپورتتىق كوڭىل-كۇي قالىپتاستىرۋعا ىقپال ەتتى.
الاتاۋ اۋدانىنىڭ، نۇركەنت شاعىناۋدانىندا اشىق فۋتبول جاتتىعۋى ءوتتى. كاسىبي جاتتىقتىرۋشىلار فلەشموب وتكىزىپ، ويىن ەلەمەنتتەرىن ۇيرەتىپ، كوماندالىق تاپسىرمالار ۇيىمداستىردى. بۇل جاسوسپىرىمدەردى بەلسەندى دەمالىس پەن سالاۋاتتى ءومىر سالتىنا تارتۋعا مۇمكىندىك بەردى.
«سپورت – دوستىق الاڭى» جوباسى ءار اۋدان تۇرعىندارىن بىرىكتىرىپ، ۋاقىتتى ءتيىمدى وتكىزۋگە، دەنە شىنىقتىرۋعا جانە سپورتتىق مادەنيەتتى قالىپتاستىرۋعا جاعداي جاسايدى. باعدارلاما جاس الماتىلىقتاردىڭ بويىنا سەنىمدىلىك، ءتارتىپ، شىدامدىلىق جانە داستۇرگە قۇرمەت سەزىمىن دارىتادى»، – دەدى قالالىق سپورت باسقارماسىنىڭ وكىلدەرى.