الماتىدا پوليسەيلەردى ۇرىپ-سوعىپ جاتقان جانتۇرشىگەرلىك ۆيدەو جاريالاندى

185 ءتارتىپ ساقشىسى جاراقات الدى

الماتى قالالىق پد پوليسەيلەردى ۇرىپ-سوعىپ جاتقان بەينەلەردى كورسەتتى، دەپ حابارلايدى Almaty-akshamy.kz Polisia.kz-كە سىلتەمە جاساپ. 

بۇل جيناق 4-5 قاڭتار ارالىعىنداعى بەينەباقىلاۋ جۇيەلەرىنىڭ دەرەكتەرى مەن الەۋمەتتىك جەلىلەردەگى ماتەريالداردان جاسالعان. 

ەسكە سالا كەتەيىك، جۇزدەگەن اگرەسسيۆتى ادامدار تارتىپسىزدىكتەردى، توناۋدى جانە باسقا دا زاڭسىز ارەكەتتەردى باسۋ كەزىندە پوليسيا قىزمەتكەرلەرىنە، اسكەري قىزمەتكەرلەرگە بىرنەشە رەت شابۋىل جاساپ، سوققىعا جىققان.

جالپى العاندا، لاڭكەستىك ارەكەتتەردىڭ جولىن كەسۋ جانە مەملەكەتتىك ورگانداردىڭ اكىمشىلىك عيماراتتارى مەن ستراتەگيالىق نىساندارىنا قارۋلى شابۋىلداردى تويتارۋ ناتيجەسىندە الماتى پوليسياسىنىڭ ءۇش قىزمەتكەرى قازا تاپتى، تاعى 185 ءتارتىپ ساقشىسى جاراقات الدى، ولاردىڭ ەكەۋىنىڭ جاعدايى اۋىر. 

قاڭتاردىڭ 5ء-ى كۇنى المالى اۋداندىق پب جانىنداعى پوليسيا ءبولىمىنىڭ اكىمشىلىك عيماراتىنا جاسالعان شابۋىلعا تويتارىس بەرۋ كەزىندە ەكى پوليسيا قىزمەتكەرى الەن اسىلحانوۆ پەن رينات قامبەتوۆ جاراقات الىپ، وقيعا ورنىندا قازا تاپتى. تاعى ءبىر ءتارتىپ ساقشىسى نۇربولسىن الماسوۆ ستراتەگيالىق ماڭىزى بار نىسانداردىڭ ءبىرىن قورعاۋ كەزىندە قايتىس بولدى. 

اسكەري جانە قىزمەتتىك بورىشىن وتەۋ كەزىندە كورسەتكەن باتىلدىعى مەن جانقيارلىعى، سونداي-اق مەملەكەت مۇددەسىن قورعاۋداعى ەرلىكتەرى ءۇشىن بۇل پوليسيا قىزمەتكەرلەرى ءىىى دارەجەلى «ايبىن» وردەنىمەن ماراپاتتالدى.