ءىز-تۇزسىز جوعالىپ كەتكەندەر تۋرالى 106 ءوتىنىش تۇسكەن
الماتىدا جاپپاي تارتىپسىزدىك كەزىندە ءىز-تۇزسىز جوعالعان 48 جان تابىلدى. بۇل تۋرالى Lider.kz ۆولونتەرلەر قوزعالىسىنىڭ جەتەكشىسى ديلميرا بلاس مالىمدەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ءبىز ءىز-تۇزسىز جوعالىپ كەتكەندەر تۋرالى 106 ءوتىنش قابىلدادىق. ونىڭ 48ء-ى تابىلدى. ءقازىر ءبىز ادامداردى ىزدەستىرۋ جۇمىستارىن بەلسەندى تۇردە جۇرگىزىپ جاتقان جوقپىز. تەك ەگدە جاستاعىلار مەن بالالاردى تابۋعا كومەكتەسىپ جاتىرمىز»، – دەدى قوزعالىس جەتەكشىسى.
ەرىكتىلەر ءبىرىنشى كەزەكتە اۋرۋحانا، پوليسيا، ءمايىتحاناعا حابارلاسىپ، جوعالعان ادام تۋرالى اقپاراتتى ناقتىلايدى. ول جاقتان تابىلماعان جاعدايدا عانا ءاتى-جونى، فوتوسى كورسەتىلگەن پاراقشالاردى كوشەلەرگە ىلەدى.
ەرىكتىلەردىڭ ايتۋىنشا، جوعالعان ادامداردىڭ باسىم بولىگى قاماۋدا. ديلميرا بلاس ءبىرىنشى قاڭتار كۇنى جوعالىپ كەتكەن 13 جاستاعى ءجاسوسىپىرىمدى تاپقاندارىن ايتتى.
«وسىدان ەكى كۇن بۇرىن ءبىزدىڭ قىز-جىگىتتەر ءبىرىنشى قاڭتار كۇنى جوعالىپ كەتكەن 13 جاستاعى بالانى تاپتى. ءجاسوسىپىرىم امان-ەسەن. ول وسى ۋاقىتقا دەيىن اۋەجاي ايماعىندا اداسىپ جۇرگەن»، – دەيدى ول.
سونداي-اق بۇگىن Lider.kz ۆولونتەرلەرى قان تاپسىرىپ، ورتەنىپ كەتكەن اكىمدىك عيماراتىن تازالاۋعا اتسالىسۋدا.