ىستامبۇلدا مىڭنان استام جولاۋشى قالىپ قويعان
تۇركيادا قالىپ قويعان قازاقستاندىقتاردى ەلگە جەتكىزۋ اياقتالدى. بۇل تۋرالى قازاقستاننىڭ ىستامبۇلداعى باس كونسۋلى ءالىم بايەل مالىمدەدى، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
2022 جىلدىڭ 5 قاڭتارىنان باستاپ تەك ىستامبۇلدا مىڭنان استام جولاۋشى قالىپ قويعان. وسىعان بايلانىستى، قازاقستاننىڭ تۇركياداعى ەلشىلىگى مەن ىستامبۇلداعى باس كونسۋلدىعى ازاماتتارعا اقپاراتتىق، قۇقىقتىق جانە ماتەريالدىق كومەك كورسەتۋ بويىنشا جەدەل شتاب قۇرىپ، جان-جاقتى قولداۋدى كورسەتتى.
باس كونسۋلدىق الەۋمەتتىك پاراقشالاردا ازاماتتاردى ولاردىڭ قازاقستانعا ورالۋى تۋرالى ۋاقتىلى حاباردار ەتۋ ءۇشىن ارنايى حابارلاما چاتتارىن ىسكە قوستى. ىستامبۇلدىڭ ەكى اۋەجايىندا دا ازاماتتارعا قاجەتتى كومەك كورسەتۋ ماقساتىندا كونسۋلدىق قىزمەتكەرلەرىنىڭ كەزەكشىلىگى ۇيىمداستىرىلدى. قازاقستانعا وزبەكستان، قىرعىزستان جانە رەسەي ارقىلى جەتۋگە شەشىم قابىلداعان ازاماتتارعا بيلەت ساتىپ الۋ، سونداي-اق، ولاردىڭ قوزعالىسىن قر-نىڭ ءتيىستى ەلدەردەگى شەتەلدىك مەكەمەلەرىمەن ۇيلەستىرۋ بويىنشا كومەك كورسەتىلدى.
باس كونسۋلدىق رەيستەردى كۇتۋ كەزىندە اسا مۇقتاج 154 جولاۋشىنى قالاداعى قوناقۇيلەردە اقىسىز ورنالاستىردى. ەرىكتىلەر مەن ىستامبۇلداعى قازاق دياسپوراسىنىڭ وكىلدەرى 100-دەن استام وتانداسىمىزدى ىستىق تاماق پەن جىلى توسەكپەن قامتاماسىز ەتتى. سونداي-اق، ديپلوماتتاردىڭ ۇيلەستىرۋىمەن 300-دەن استام جولاۋشى ىستىق تاماقپەن، 200-گە جۋىق جولاۋشىعا قالا ىشىندە ارنايى تاسىمال كولىكتەرى قىزمەت كورسەتتى.
قازاقستاندىق ديپلوماتتار اۋە كومپانيالارىمەن تۇراقتى بايلانىستا بولىپ، رەيستەردى تەز ارادا قالپىنا كەلتىرۋ جونىندە كەلىسسوزدەر جۇرگىزدى. جاعدايدىڭ تۇراقتانۋىنا قاراي قازاقستانعا اۋە رەيستەرى قالپىنا كەلە باستادى. باس كونسۋلدىق رەيستەرى ورىندالماعان بارلىق جولاۋشىلاردى ەلگە جەتكىزۋ ءۇشىن ازاماتتار مەن اۋە كومپانيالارىنىڭ ارەكەتتەرىن ۇيلەستىردى. 15 قاڭتارداعى جاعدايعا سايكەس، ىستامبۇلدان قازاقستاننىڭ ءتۇرلى قالالارىنا 2500-دەن استام قازاقستاندىق ۇشقان. انتاليادا قالىپ قويعان قازاقستاندىقتاردىڭ دا بارلىعى دەرلىك ەلگە جەتكىزىلدى.
ماسەلەن، باس كونسۋلدىقتىڭ تۇرىك اۋە جولدارىمەن كەلىسىمى بويىنشا 11 قاڭتاردا الماتىعا 151 ازامات ورالدى، ونىڭ ىشىندە 75 جولاۋشى بورتقا اقىسىز قابىلداندى. قازىرگى ۋاقىتتا بارلىق اۋە كومپانيالارى (Air Astana، تۇرىك اۋە جولدارى، FlyArystan، Scat جانە ت.ب.) رەيستەرىن ءوز كەستەلەرىنە سايكەس شتاتتىق رەجيمدە ورىنداۋدا. تۇركيادان كەلگەن جولاۋشىلاردى الماتى اۋەجايى دا قابىلداۋدا.