الماتىدا پوليسەيلەر تۇرعىننىڭ ءومىرىن ساقتاپ قالدى

الماتىدا پوليسەيلەر تۇرعىننىڭ ءومىرىن ساقتاپ قالدى.

پاترۋلدىك پوليسيا قىزمەتكەرلەرى 14-قاباتتاعى پاتەردىڭ تەرەزەسىنەن سەكىرىپ كەتپەك بولعان 32 جاستاعى ەر ادامنىڭ ءومىرىن ساقتاپ قالدى، دەپ حابارلايدى aqshamnews.kz Polisia.kz-كە سىلتەمە جاساپ. 

"ساعات 22:40-تا بەلگىسىز بىرەۋدىڭ كوپقاباتتى ۇيدەن سەكىرمەك بولعانى تۋرالى قوڭىراۋ كەلىپ ءتۇستى. وقيعا ورنىنا بىردەن ەكى ەكيپاج “بۋران-138” جانە “بۋران-160” باردى. اقپارات راستالدى. كونديسيونەر بولىمىندە ءوزىن-وزى ولتىرەمىن دەپ قورقىتقان ەر ادام وتىرعان. پوليسيا اعا لەيتەنانتى نۇرجان توعانبايەۆ كورشى پاتەردىڭ تەرەزەسىنەن كەلىسسوز جۇرگىزدى. وسى كەزدە تج قىزمەتكەرلەرىنىڭ كومەگىمەن ارىپتەستەرىم ايدوس سارقۇلوۆ پەن ايبار بايجىگىتوۆ ۇشەۋمىز ەسىكتى بۇزدىق، سوسىن قاراڭعىدا جارىقتى قوسپاي، تەرەزەنىڭ سىرتىنداعى ەر ادامنىڭ جانىنا كەلدىك. بىرنەشە سەكۋندتا ءبىز ونى قاتتى ۇستاپ الىپ، پاتەرگە سۇيرەپ كىرگىزدىك"، - دەدى الماتى قالاسى پد جپقب پاترۋلدىك پوليسيا پولكىنىڭ ينسپەكتورى رۋستام قادىربايەۆ.

 تەرەزەدەن سەكىرمەكشى بولعان ادام تۇرعىن ءۇي كەشەنىنىڭ تۇرعىنى بولىپ شىقتى. ونىڭ بىرنەشە كۇن بويى تاۋلىكتىك جالدامالى پاتەردە تۇرعانى بەلگىلى بولدى. ءبىر نۇسقا بويىنشا، ەر ادام ەسىرتكىگە ماس بولعان. جەدەل جاردەم بريگاداسى وعان العاشقى مەديسينالىق كومەك كورسەتتى. باسقا دا ءمان-جايلاردى بوستاندىق اۋداندىق پوليسيا باسقارماسىنىڭ قىزمەتكەرلەرى انىقتاپ جاتىر.