2024 جىلى الماتى بيۋدجەتىنىڭ كىرىسى 1874 ملرد تەڭگەگە دەيىن ءوستى
2024 جىلى الماتى قارقىندى الەۋمەتتىك-ەكونوميكالىق دامۋدى كورسەتتى. قالانىڭ قىسقا مەرزىمدى ەكونوميكالىق ينديكاتورى 5،5% بولجامدى وسىمنەن اسىپ، 8،3%-عا جەتتى. كولىك قىزمەتتەرىنىڭ كولەمى 25،3%-عا، قۇرىلىس كولەمى 17%-عا جانە ساۋدا كولەمى 8،6%-عا ءوسۋدىڭ درايۆەرلەرى بولدى، دەپ حابارلايدى aqshamnews.kz
2024 جىلدىڭ 9 ايىندا الماتى قالاسىنىڭ جالپى وڭىرلىك ءونىمى ناقتى كورسەتكىشتە 3،8%-عا ءوستى. 2024 جىلدىڭ قورىتىندىسى بويىنشا قالانىڭ ءجوو ءوسىمى 5،8%-6% دەڭگەيىندە باعالانسا، 2025 جىلى ەكونوميكالىق ءوسىمنىڭ 6،4%-عا دەيىن جەدەلدەۋى بولجانىپ وتىر.
قالا ەكونوميكاسىنىڭ قارقىندى ءوسۋىنىڭ ارقاسىندا جەرگىلىكتى بيۋدجەتتىڭ كىرىسى ارتىپ كەلەدى. 2024 جىلى الماتى بيۋدجەتىنە 1 874 ملرد تەڭگە سالىق جانە تولەمدەر ءتۇستى، بۇل 24% ءوسىم كورسەتىپ وتىر. نەگىزگى كىرىستەر – شامامەن 70%-ى - شوب دامۋى ەسەبىنەن قامتاماسىز ەتىلگەن.
2024 جىلدىڭ 9 ايىندا الماتىلىقتاردىڭ ورتاشا تابىسى 335 مىڭ تەڭگە بولىپ، ناقتى كورسەتكىشتە 10،2%-عا ءوستى. ورتاشا ايلىق جالاقى ناقتى تۇردە 6،1%-عا ءوسىپ، 470 مىڭ تەڭگەگە جەتتى، بۇل وتكەن جىلدىڭ وسى كەزەڭىمەن سالىستىرعاندا جوعارى.
2024 جىلى 73،9 مىڭ جۇمىس ورنى قۇرىلدى، ونىڭ 83،2%-ى – تۇراقتى جۇمىس ورىندارى (61،5 مىڭ). سونىڭ ناتيجەسىندە 2024 جىلدىڭ III توقسانىندا جۇمىسسىزدىق دەڭگەيى 4،6%-عا دەيىن تومەندەدى.
جوعارى ىسكەرلىك جانە ينۆەستيسيالىق بەلسەندىلىك ساقتالۋدا. 2024 جىلى نەگىزگى كاپيتالعا ينۆەستيسيا وڭدەۋ ونەركاسىبىنە (2،9 ەسە)، بىلىمگە (84،7%)، كولىك (37،5%)، دەنساۋلىق ساقتاۋ (31،3%) سالالارىنا سالىنعان ينۆەستيسيانىڭ ايتارلىقتاي ءوسۋى ەسەبىنەن 8،2%-عا ۇلعايدى. 90%-ى جەكە ينۆەستيسيا بولسا، ولاردىڭ ءوسىمى 6،2% بولدى.
قالانىڭ قولايلى ينۆەستيسيالىق كليماتى جوعارى نەسيە رەيتينگپەن راستالادى. 2024 جىلعى 6 جەلتوقساندا Fitch Ratings اگەنتتىگى الماتى قالاسىنىڭ «ۆۆۆ+» دەڭگەيىندەگى دەربەس نەسيە رەيتينگىن، «تۇراقتى» بولجامىن راستادى.
شاعىن جانە ورتا بيزنەس قارقىندى دامۋدا، بۇل سالادا تۇراقتى جۇمىس ورىندارىنىڭ 80%-دان استامى قۇرىلدى. 2024 جىلى سۋبسيديالاۋعا، كەپىلدىك بەرۋگە جانە نەسيە بەرۋگە بيۋدجەتتەن 53،1 ملرد تەڭگە ءبولىنىپ، شوب-تىڭ 2507 جاڭا جوباسى قولداۋ تاپتى.
وڭدەۋ ونەركاسىبىن دامىتۋ قالا ەكونوميكاسىن ءارتاراپتاندىرۋدىڭ نەگىزگى باسىمدىقتارىنىڭ ءبىرى. «الماتى» يندۋستريالىق ايماعىندا 485 ملرد تەڭگەگە 67 جوبا ىسكە اسىرىلىپ، 11،6 مىڭ جۇمىس ورنى قۇرىلدى. 2025 جىلى 197 ملرد تەڭگەگە 15 جوبانى پايدالانۋعا بەرۋ جوسپارلانۋدا، بۇل 2700 جۇمىس ورنىن اشۋعا مۇمكىندىك بەرەدى. «اتپ» اەا-دا 31 ملرد تەڭگەگە 13 جوبا جۇزەگە اسىرىلىپ، 220 جۇمىس ورنى اشىلدى. بيىل 10 ملرد تەڭگەگە 5 جوبانى ىسكە قوسۋ كوزدەلگەن، بۇل 361 جۇمىس ورنىن اشۋعا سەپتىگىن تيگىزەدى.
2040 جىلعا دەيىنگى بەكىتىلگەن باس جوسپارعا سايكەس، قۇرىلىس تىعىزدىعىنىڭ تومەندەتۋ جانە جاسىل ايماقتاردى ۇلعايتۋ كوزدەلىپ وتىر. وسىعان بايلانىستى 2024 جىلى پايدالانۋعا بەرىلگەن تۇرعىن ءۇي كولەمىنىڭ 10،3%-عا تومەندەدى. 2023 جىلى 2،67 ملن شارشى مەتر بولسا، 2024 جىلى 2،4 ملن شارشى مەتر تۇرعىن ءۇي پايدالانۋعا بەرىلدى.
جالپى، 2024 جىلعا بەلگىلەنگەن ەكونوميكالىق ءوسىم مەن بيۋدجەت كىرىسىنىڭ بارلىق پارامەترى ورىندالدى. بيىل دا الەۋمەتتىك-ەكونوميكالىق كورسەتكىشتەردىڭ قارقىندى دامۋى جالعاسادى.