الماتى قالاسىنىڭ بوستاندىق اۋدانىندا كۇندىز تيميريازيەۆ كوشەسىندە ورنالاسقان دۇكەننىڭ قاسبەتىنەن ءورت شىقتى.
وقيعاعا سول كەزدە اۋىسىمىنان كەيىن ۇيىنە قايتىپ كەلە جاتقان جىلدام قيمىلدايتىن ارنايى جاساق قىزمەتكەرى جەڭىس ءابدىراحمانوۆ كۋا بولعان. ول ويلانباستان كومەككە ۇمتىلدى. ونىڭ ايتۋىنشا، ەڭ ءبىرىنشى ورىندا – عيماراتتا ادامداردىڭ جوق ەكەنىنە كوز جەتكىزۋ بولدى.
— ءتۇتىندى كورىپ، جاعدايدىڭ كۇردەلى ەكەنىن ءتۇسىندىم. الدىمەن ىشىندە ادامداردىڭ بار-جوعىن تەكسەرىپ، ەشكىم زارداپ شەكپەگەنىنە كوز جەتكىزدىم. سودان كەيىن جاقىن ماڭنان ساتى تاۋىپ، قويۋ ءتۇتىن شىققان شاتىر بولىگىن اشتىم. استىنان وت وشاعى انىقتالدى. قولدا بار قۇرالدارمەن جالىندى ءسوندىرىپ ۇلگەردىم، كەيىن وقيعا ورنىنا ءورت سوندىرۋشىلەر كەلدى، — دەدى ءابدىراحمانوۆ.
پوليسەيدىڭ باتىل ارەكەتىنىڭ ارقاسىندا ءورتتىڭ كەڭىنەن تارالۋى مەن ادام شىعىنىنىڭ الدىن الۋ مۇمكىن بولدى. ءورت باستاپقى كەزەڭدە وقشاۋلاندى. جەڭىس ابدراحمانوۆ بۇل – ءاربىر سانالى ازاماتتىڭ جاساۋى ءتيىس ءىسى دەپ ەسەپتەيدى.
— مەن تەك دۇرىس دەپ ساناعان ارەكەتتى جاسادىم. مۇنداي ساتتەردە قىزمەتتە ەكەنىڭ ماڭىزدى ەمەس. ەگەر كومەكتەسە الساڭ، قايعىلى جاعدايدىڭ الدىن الۋعا مۇمكىندىك بولسا – ارەكەت ەتۋ كەرەك. مەنىڭ ورنىمدا كەز كەلگەن ازامات سولاي ىستەر ەدى دەپ ويلايمىن، — دەدى ول.