كوسپلەي ونەرى جايلى ەستىپ پە ەدىڭىز؟ بۇل - بەلگىلى ءبىر كەيىپكەردىڭ بەينەسىنە ەنىپ، ونىڭ سىرت كەلبەتىن، كوستيۋمىن، ءتىپتى مىنەز-قۇلقىن دالمە-دال جەتكىزەتىن ونەر ءتۇرى. الەمدە كەڭىنەن تارالعان بۇل حوببي ءقازىر ەلىمىزدە دە قانات جايىپ كەلەدى. ال جاقىندا عانا حالىقارالىق Comic Con Astana-2025 فەستيۆالىندە قازاقستاندىق كوسپلەي مودەل ەميليا تروسەنكو گران-پري جەڭىپ الىپ، كوپشىلىكتىڭ نازارىن اۋداردى. ول Dota 2 ويىنىنىڭ كەيىپكەرى Naga Siren وبرازىن ەرەكشە شەبەرلىكپەن سومداپ، قازىلار القاسىن ءتانتى ەتتى. ەرەكشە ونەر يەسىنىڭ شىعارماشىلىق جولى قالاي باستالدى؟ اqshamnews.kz ءتىلشىسى كەيىپكەرمەن سۇحباتتاستى.
cۋرەت: instagram.com/grafomanka
ەميليا - ورال قالاسىنىڭ تۋماسى. كەيىنگى سەگىز جىلدان بەرى استانادا تۇرادى. ول ەل استاناسىنان ءوزىنىڭ جان قالاۋىن، شىعارماشىلىق تىنىشتىعىن تاپقان. جاسى - 34-تە. نەگىزگى كاسىبى - باربەرينگ. بۇل سالادا 9 جىلدىق تاجىريبەسى بار. الايدا كەيىنگى ەكى جارىم جىل ىشىندە ول جاڭا باعىتقا - پسيحولوگياعا بەت بۇرعان. ءقازىر ماسكەۋ پسيحواناليز ينستيتۋتىندا "كلينيكالىق پسيحولوگيا" ماماندىعى بويىنشا ماگيستراتۋرادا وقىپ ءجۇر جانە گەشتالت-تەراپيەۆت بولۋعا دايىندالىپ جاتىر. ال كوسپلەي مودەلى بولۋ - ونىڭ شىعارماشىلىق ءحوببيى.
كوسپلەي الەمىنە العاشقى قادام
ەميليانىڭ كوسپلەيگە دەگەن قىزىعۋشىلىعى 2014 جىلى ورال قالاسىندا باستالعان. ول كەزدە "حوببيت" ءفيلمىنىڭ پرەمەراسىنا ەلفتەر كەيپىندە قاتىسۋ يدەياسىمەن "ساقينالار ءامىرشىسى" فاندومى اتىنان قاتىسقان. بۇل ونىڭ العاشقى كوسپلەي تاجىريبەسى بولدى.
"سول كەزدەن باستاپ ءتۇرلى تانىمال كەيىپكەرلەردىڭ بەينەسىن جاساۋعا اۋەستەنە باستادىم. وتباسىم حوبييىمە ۇنەمى قولداۋلارىن بىلدىرەدى. اسىرەسە العاشقى وبرازدارىمدى جاساۋعا انام كوپ كومەكتەستى"، - دەيدى ەميليا.
cۋرەت: instagram.com/grafomanka
"جاپون ەستەتيكاسىنان شابىت الامىن"
"Comic Con Astana" فەستيۆالى - جىل سايىن وتەتىن گيك-مادەنيەت ءىس شاراسى. حالىقارالىق فەستيۆالدە ءتۇرلى مادەنيەت وكىلدەرى باس قوسىپ، بايقاۋلارعا قاتىسىپ، ب ا ق سىنايدى. ەميليا "Comic Con Astana" فەستيۆالىنە 2019 جىلدان بەرى قاتىسىپ كەلەدى. سول جىلدان بەرى العاش رەت بيىل عانا جۇلدەگەر اتانىپ وتىر.
"پاندەميا كەزىندە ءۇزىلىس بولعانىمەن، 2023 جىلدان باستاپ قايتادان بەلسەندى قاتىسا باستادىم. 2023 جانە 2024 جىلدارى فينالعا شىقسام دا، جۇلدەگە ىلىكپەدىم. ال بيىل بايقاۋعا Naga Siren كەيىپكەرىن تاڭداۋىما Dota 2 ويىنىنا دەگەن سۇيىسپەنشىلىگىم سەبەپ بولدى. مەن جاپون ەستەتيكاسىنان شابىت الامىن. سوندىقتان بۇل وبرازبەن جۇمىس ىستەۋ مەن ءۇشىن ۇلكەن ءلاززات سىيلادى"، - دەيدى ول.
cۋرەتتە: ەميليانىڭ بايقاۋداعى Naga Siren وبرازى
ەميليا بۇل وبرازدى جاساۋعا ءتورت اي ۋاقىتىن جۇمساعان. ءار دەتالعا ءجىتى ءمان بەرگەن. قالىپتارىن قاجەتتى ماتەريالداردان قۇيىپ، بوياپ، جانىن سالعان. ول وبرازدى دايىنداۋعا جىگىتى كومەكتەسكەنىن ايتتى.
"وبرازدان بولەك ساحنالىق قويىلىمدى ويلاستىرۋ دا ءبىراز ەڭبەكتى تالاپ ەتتى. ءنومىر يدەياسى Rammstein توبىنىڭ "Sonne" ءانىن تىڭداپ وتىرعان كەزدە ويدا كەنەتتەن پايدا بولدى. بۇل ءان مەنىڭ سۇيىكتى شىعارمالارىمنىڭ ءبىرى. سيرەنا بەينەسىندە ۆوكال پارتياسىن جەتكىزگىم كەلدى. كوستيۋمنىڭ بورتتارىن جاساۋ كۇتپەگەن جەردەن قيىنعا سوقتى. ولاردى ارت-رەفەرەنستەردەن شىنايى كورىنىسكە اينالدىرۋ وڭاي بولمادى، اسىرەسە ارقاداعى بانتيكتىڭ جيەگى قيىن بولدى. سونىمەن قاتار، بۇل مەنىڭ العاش جاساعان كاركاس نەگىزىندەگى پاريگىم. مەن وسى جۇمىستىڭ ناتيجەسىمەن ەرەكشە ماقتانامىن"، -دەدى ونەر يەسى.
"جۇلدەلى بولاتىنىما سەنىمدى بولدىم"
ەميليا بايقاۋدان قۇر قول قايتپايتىنىنا سەنىمدى بولعان. الايدا باس جۇلدەنى جەڭگەندە ابدىراپ قالعانىن جاسىرمادى.
"وزگە قاتىسۋشىلاردىڭ دەڭگەيى وتە جوعارى بولدى. ءار كوستيۋمدە وراسان زور ەڭبەك جاتقانى كورىنىپ تۇردى. شىنىمدى ايتسام، بايقاۋدان ءبىر نوميناسيا نەمەسە ەكىنشى/ءۇشىنشى ورىن الۋعا ۇمىتتەندىم. ال باس جۇلدەنى جەڭەمىن دەپ مۇلدە ويلامادىم. مەنىڭ ەسىمىم اتالعاندا، باقىتتان كوزىمە جاس كەلىپ، ساحناعا دىرىلدەگەن اياقپەن ارەڭ شىقتىم. ەڭبەگىمنىڭ ەلەنگەنىنە قۋانىشتى بولدىم"، - دەيدى ەميليا.
cۋرەت: instagram.com/grafomanka
كوسپلەيشىنىڭ ەندىگى ارمانى...
ەميليا تروسەنكو ەندى ەل اتىنان گەرمانيادا وتەتىن حالىقارالىق كوسپلەيشىلەر بايقاۋىنا قاتىسىپ، قازاقستاننىڭ دا جاڭا باعىتتاعى ونەر كەڭىستىگىنەن حاباردار ەكەنىن كورسەتىپ، جۇلدەلى ورىن الۋ ەكەنىن ايتتى. ول اتالمىش بايقاۋعا دەمەۋشى ىزدەپ جاتقانىن دا جاسىرمادى.
"ءقازىر مەنىڭ باستى ماقساتىم - بيىل گامبۋرگ قالاسىندا وتەتىن The International اياسىنداعى حالىقارالىق كوسپلەي بايقاۋىنا قاتىسۋ ءۇشىن دەمەۋشى تابۋ. قازاقستان اتىنان وسىنداي اۋقىمدى شاراعا العاش رەت قاتىساتىن كوسپلەيشى بولعىم كەلەدى. بۇل - مەنىڭ ارمانىم جانە مەن ونى جۇزەگە اسىرۋعا تولىق دايىنمىن!"، - دەيدى ول.
ايتا كەتەيىك، كوسپلەي ونەرى -1980-جىلدارى جاپونيادا قارقىندى دامىپ، بۇگىندە الەم بويىنشا كاسىبي شىعارماشىلىق باعىتقا اينالعان. قازاقستاندا كوسپلەي 2000-جىلداردىڭ ورتاسىندا پايدا بولىپ، 2010 جىلدان بەرى ءتۇرلى فان-فەستيۆالدەر مەن بايقاۋلار ارقىلى كەڭ تارالا باستادى. كەيىنگى جىلدارى Comic Con Astana سەكىلدى ءىرى شارالار كوسپلەي ونەرىن جاڭا دەڭگەيگە شىعارىپ وتىر. قازاق كوسپلەيشىلەرى الەمدىك ساحناعا شىعۋعا دايىن ەكەنىن ەميليا سەكىلدى تالانتتار دالەلدەپ كەلەدى.