الماتىدا پويىز بيلەتتەرىن زاڭسىز ساتقان دەلدالدار ۇستالدى

الماتىدا پويىز بيلەتتەرىن ساتىپ، جولاۋشىلارعا زاڭسىز قىزمەت ۇسىنعان دەلدالدار ۇستالدى.

جۇرت بيلەت تاپپاي، سابىلىپ جۇرسە، كەي پىسىقتار مۇنى تابىس كوزىنە اينالدىرعان. جىلدا جاز مەزگىلىندە قايتالاناتىن بۇل جاعدايعا توسقاۋىل بولماي تۇر. پويىزدارعا بيلەت جوق، دەپ حابارلايدى almaty-akshamy.kz 24.kz-كە سىلتەمە جاساپ. 

قازاقستاندىقتار باراتىن جەرىنە ۋاقىتىلى جەتۋ ءۇشىن ەرتەرەك قامدانۋدى ادەتكە اينالدىرعان. ال شۇعىل جولعا شىعۋى كەرەك ادامدار كاسسا تابالدىرىعىن توزدىرىپ ءجۇر. 

مۇنداي كەزدى پىسىقايلار ۇتىمدى پايدالانادى. ولار ۆوكزالعا كەلگەن كوپشىلىككە "كومەگىن" ۇسىنىپ، پايدا كورىپ ءجۇر. جاقىندا الماتىدا وسىنداي زاڭسىز قىزمەتپەن اينالىسقاندار ۇستالدى.

ناريمان دۇيسەكەيەۆ، «جولاۋشىلار تاسىمالى» اق رەسمي وكىلى: 

ءقازىر 15 سيفرلىق پلاتفورما ارقىلى بيلەت ساتىپ الۋعا بولادى. ودان بولەك بيلەت.رەيلۋەيس.كز سايتىندا ەشقانداي كوميسسياسىز جول ءجۇرۋ قۇجاتى ساتىلادى. ەگەر ءسىز قالاعان باعىتتا بيلەت بولماسا كۇتۋ پاراعىنا تىركەلە الاسىز. كەزەككە جولعا شىعۋدان جەتى كۇن بۇرىن، ءتىپتى بىرنەشە ساعات قالعاندا دا تۇرۋعا بولادى. جىل باسىنان بەرى 17 مىڭ بيلەت وسى كۇتۋ پاراعى ارقىلى ساتىلدى.

 جاۋاپتىلاردىڭ ايتۋىنشا، بيلەتتىڭ بولماۋىنا ۆاگون تاپشىلىعى باستى سەبەپ. ءقازىر ۇلتتىق تاسىمالداۋشىنىڭ 2150 ۆاگونى بار. ونىڭ 450ء-ى ەسكىرگەن. 2030 جىلعا دەيىن پاركتى 90 پايىز جاڭارتۋدى جوسپارلاپ وتىر. بۇل باعىتتا وتاندىق جانە شەتەلدىك كومپانيالارمەن كەلىسىمدەر جاسالدى.