قازاقستان مەن بەلارۋستىڭ بىرىككەن بارلاۋ بولىمشەلەرى تورۋىل ۇيىمداستىرۋ، قاجەتتى اقپاراتتى الۋ جانە قۇپيا قۇجاتتاردى الىپ، توپتى تۇراقتى ورنالاسۋ پۋنكتىنە ەۆاكۋاسيالاۋ ماقساتىمەن تاۋدان استى.
جاۋىنگەرلىك تاپسىرمانى ورىنداۋ كەزىندە «باۋىرلاستىق شىڭى-2024» وقۋ-جاتتىعۋىنا قاتىسۋشىلار بولىمشەلەردىڭ ۇيلەسىمدىلىگى مەن ءارتۇرلى دارەجەدەگى كومانديرلەردىڭ شەشىم قابىلداۋ قابىلەتى باعالاندى، دەپ حابارلايدى almaty-akshamy.kz قورعانىس مينيسترلىگىنە سىلتەمە جاساپ.
باعىنىشتىلاردىڭ ىس-ارەكەتىن قازاقستان دەسانتتىق-شابۋىلداۋ اسكەرلەرىنىڭ قولباسشىسى گەنەرال-مايور الماز جۇماكەيەۆ پەن شتاب باستىعى – بەلارۋس قارۋلى كۇشتەرى ارنايى وپەراسيالار كۇشتەرى قولباسشىسىنىڭ ءبىرىنشى ورىنباسارى پولكوۆنيك الەكساندر يليۋكيەۆيچ قاداعالادى.
– ءتاۋلى-شولدى جەرلەردە ەكىجاقتى تاكتيكالىق-ارنايى وقۋ-جاتتىعۋدىڭ پراكتيكالىق بولىگى اياقتالدى. كوماندالىق قۇرامنىڭ دەڭگەيى وتە جوعارى بولدى. مۇنى ءبىرتۇتاس ورگانيزم رەتىندە ارەكەت ەتكەن ەكى ەلدىڭ بولىمشەلەرىنىڭ ۇيلەسىمدىلىگى دەپ باعالاۋعا بولادى. بىرىككەن جاساقتاردىڭ اسكەري قىزمەتشىلەرى دەنە دايىندىعى مەن ءوزارا ءىس-قيمىلدىڭ جوعارى دەڭگەيىن كورسەتتى، – دەپ قورىتىندىلادى وقۋ-جاتتىعۋدىڭ جەتەكشىسى گەنەرال-مايور الماز جۇماكەيەۆ.
بەلارۋس قارۋلى كۇشتەرى ارنايى وپەراسيالار كۇشتەرىنىڭ نۇسقاۋشىلارى قازاقستاندىق دەسانتشىلارمەن ءوز تاجىريبەلەرىن ءبولىستى. ارنايى جاساقتار جاۋمەن تىكەلەي قاقتىعىس جاعدايىندا تاكتيكالىق مەديسينا بويىنشا ساباقتار وتكىزدى.
قازاقستان دەسانتتىق-شابۋىلداۋ اسكەرلەرىنىڭ قولباسشىسى اتاپ وتكەندەي، بىرىككەن كونتينگەنت الدىنا قويىلعان بارلىق مىندەتتەردى تولىق كولەمدە ورىندادى. ەكى ەل اراسىندا وسىنداي وقۋ-جاتتىعۋلاردى جىل سايىن وتكىزۋ جوسپارلانۋدا. الدا قارۋلى كۇرەستىڭ جاڭا تاسىلدەرى مەن قۇرالدارىنىڭ پايدا بولۋىن ەسكەرە وتىرىپ، وزگەرىستەر ەنگىزىلىپ، مىندەتتەر كۇردەلەنە تۇسپەك. جەكە قۇرامنىڭ ءبىلىمى، داعدىلارى مەن تاجىريبەسى ارتادى.
ەستەرىڭىزگە سالا كەتەيىك، «باۋىرلاستىق شىڭى-2024» ەكى جاقتى تاكتيكالىق-ارنايى وقۋ-جاتتىعۋى 15-20 شىلدە ارالىعىندا جەتىسۋ وبلىسىنداعى «كوكتال» وقۋ پوليگونىندا وتكىزىلدى. وعان قازاقستان قارۋلى كۇشتەرى دەسانتتىق-شابۋىلداۋ اسكەرلەرىنىڭ جانە بەلارۋس قارۋلى كۇشتەرى ارنايى وپەراسيالار كۇشتەرىنىڭ 350-دەن استام اسكەري قىزمەتشىسى قاتىستى.
وقۋ-جاتتىعۋلاردىڭ سالتاناتى جابىلۋ راسىمىندە مانيەۆرلەر بارىسىندا ەرەكشەلەنگەن ەكى ەلدىڭ اسكەري قىزمەتشىلەرى باسشىلىق تاراپىنان گراموتالارمەن جانە باعالى سىيلىقتارمەن ماراپاتتالدى.