ق ر مادەنيەت جانە اقپارات مينيسترلىگى «ايبوز» ۇلتتىق ادەبي سىيلىعىنا شىعارمالاردى قابىلداۋ جالعاساتىنىن حابارلايدى.
ۇلتتىق ادەبي سىيلىق وتاندىق قالامگەرلەردى مەملەكەتتىك قولداۋ جانە قازاق ادەبيەتىنىڭ دامۋىنا ىقپال ەتۋ ماقساتىندا ءۇشىنشى رەت وتكىزىلەدى، دەپ حابارلايدى almaty-akshamy.kz.
ۇلتتىق سىيلىققا «ۇزدىك پروزا»، «ۇزدىك پوەزيا»، «ۇزدىك دراماتۋرگيا»، «ۇزدىك ادەبي اۋدارما»، «ۇزدىك بالالار ادەبيەتى»، «ۇزدىك ادەبي سىن»، «ۇزدىك كوميكس» نوميناسيالارى بويىنشا بۇرىن جاريالانباعان تۋىندىلار قابىلدانادى.
بايقاۋعا وتاندىق جازۋشىلار قاتىسا الادى جانە ۇمىتكەرلەردىڭ جاس ەرەكشەلىگىنە شەكتەۋ جوق. ادەبي سىيلىقتىڭ جالپى جۇلدە قورى – 35 ملن. تەڭگە. ءار نوميناسياعا 5 ملن تەڭگەدەن بەرىلەدى.
ءوتىنىم 2024 جىلعى 1 قىركۇيەككە دەيىن www.aiboz.kz سايتى ارقىلى جولدانۋى ءتيىس. ۇلتتىق ادەبي سىيلىق جىل سوڭىندا تابىستالادى.
تولىق اقپاراتتى www.aiboz.kz سايتىنان جانە +7 747 839 8910 نومىرىنەن بىلە الاسىزدار.