الماتىدا پاترۋلدىك پوليسيا قىزمەتكەرلەرىنە العاشقى مەديسينالىق كومەك كورسەتۋ ساباعى وتكىزىلدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
كەلەسى تاجىريبەلىك ساباق جاۋىنگەرلىك ءبولىمنىڭ تاڭعى ساپ تۇزەۋىندە ءوتتى.
«بىزگە ءداستۇرلى تۇردە “قازاقستاننىڭ قىزىل جارتى ايى” ۇەۇ-نىڭ وكىلدەرى كومەكتەسەدى. ولار جاراقاتتار مەن جازاتايىم وقيعالار كەزىندەگى العاشقى مەديسينالىق كومەك كورسەتۋ بويىنشا ساباقتار سيكلىن ۇنەمى وتكىزەدى. بۇل تاجىريبەلىك ساباقتار تەوريالىق ادەبيەتتەر مەن العاشقى مەديسينالىق كومەك قوبديشالارىن تاراتۋمەن بىرگە جۇرەدى. تاجىريبەدە پوليسيا قىزمەتكەرلەرى زارداپ شەككەندەرگە نەمەسە بوساناتىن ايەلدەرگە العاشقى مەديسينالىق كومەك كورسەتەتىن جاعدايلار كەزدەسەدى. ادامدارعا زيان تيگىزبەۋ ءۇشىن ونى دۇرىس جاساۋ ماڭىزدى»، – دەدى الماتى قالالىق پد جەرگىلىكتى پوليسيا قىزمەتى باسقارماسىنىڭ باستىعى ەرجان ۇزابايەۆ.
سونداي-اق، الماتى پوليسياسى 19 شىلدە مەن 18 تامىز ارالىعىندا “ءقاۋىپسىز جول” رەسپۋبليكالىق ايلىعى ءوتىپ جاتقانىن اتاپ ءوتتى.
«پوليسيا قىزمەتكەرلەرى جول-كولىك وقيعالارىن ازايتۋ جانە جول-كولىك وقيعالارىنىڭ الدىن الۋعا، وعان قاتىسۋشىلار اراسىندا جول قوزعالىسى قاۋىپسىزدىگى تالاپتارىنىڭ ساقتالۋىن قاداعالاۋعا، دۇرىس قوعامدىق ءتارتىپتى، جول قاۋىپسىزدىگىن قامتاماسىز ەتۋگە، سونداي-اق قىلمىستار مەن باسقا دا زاڭسىز كورىنىستەردى دەر كەزىندە الدىن الۋعا جانە جولىن كەسۋگە باسا نازار اۋدارادى. سونىمەن قاتار، قوعامدىق كولىكتەر اراسىندا جول قاۋىپسىزدىگىنىڭ الدىن الۋ جۇمىستارى كۇشەيتىلدى»، – دەدى ە. ۇزابايەۆ.