سوت وتىرىسى ونلاين رەجيمدە ءوتتى
الماتىدا گاستروەنتەرولوگ يۋريي شۋمكوۆتىڭ ولىمىنە قاتىستى ءىس بويىنشا سوت وتىرىسى جالعاسۋدا، دەپ حابارلايدى Almaty-akshamy.kz قازاقپاراتقا سىلتەمە جاساپ.
سوت وتىرىسى ونلاين رەجيمدە ءوتتى. سوتتالۋشى تەرگەۋ يزولياتورىنان قاتىستى. ونىڭ بارىسىندا پوليسيا دەپارتامەنتىنىڭ پاترۋلدىك پوليسيا پولكىنىڭ قىزمەتكەرى مەن تاكسي جۇرگىزۋشىسىنەن جابىرلەنۋشى رەتىندە جاۋاپ الىندى. الماتى قالالىق ءىىد الاتاۋ اۋداندىق پاترۋلدىك پوليسيا باسقارماسىنىڭ كومانديرى، پوليسيا اعا لەيتەنانتى ومارحانوۆ پروكۋروردىڭ سۇراقتارىنا جاۋاپ بەردى. ول دارىگەر قازا تاپقان كۇنى، ياعني 4 ساۋىردە، قىزمەتتە بولعان. تاڭعى ساعات 09:40 شاماسىندا قالادا «كۇدىكتىنى ۇستاۋ» جوسپارى جاريالانعان.
«ءبىز كۇدىكتى وتىرعان كولىكتى ۇستاۋعا اتتاندىق. «سەرگەك» بازاسىنىڭ مالىمەتى بويىنشا، كولىك «شاڭىراق» شاعىناۋدانىنا قاراي بەت الدى. بارلىق ەكيپاج سوڭىنان ەردىك، كولىك وتەمىسوۆ كوشەسىنىڭ بويىنداعى ءبىر ءۇيدىڭ جانىندا توقتاپ تۇر ەكەن. مەن جانە ءۇش ارىپتەسىم ونى ۇستادىق»، - دەدى ءتارتىپ ساقشىسى. ونىڭ ايتۋىنشا، ۇستالعان كەزدە كۇدىكتى ارتقى ورىندىقتا تەگىس ۇڭعىلى مىلتىقپەن وتىرعان. «ۇستاۋ كەزىندە كۇدىكتى قارسىلىق كورسەتتى. ۇستىنە كيگەن كۇرتەشەسىنىڭ قالتاسىنان اسحانا پىشاعى ءتۇسىپ قالدى»،- دەيدى ول.
سونىمەن قاتار، سوت بارىسىندا تاكسي جۇرگىزۋشىسى دە سويلەدى. ايتۋىنشا، ول سول كۇنى ساعات 8:00-دە ايەلىن جۇمىسقا الىپ بارعانىن، سودان كەيىن قوسىمشا ارقىلى تاپسىرىس قابىلداي باستاعان. كليەنتتى بايقاداموۆ كوشەسىنە اپارىپ تاستاپ، كولىگىن تۇراققا قويىپ جاتقان كەزىندە قولىنا قارۋ ۇستاعان بەيتانىس ەر ادام رۇقساتسىز كولىگىنىڭ ارتقى ورىندىعىنا وتىرىپ، كولىكتى وتالدىرىپ، جۇرگىزۋدى بۇيىرعان.
«ول ماعان مىلتىق كەزەپ، كەتتىك دەدى. مەن قورقىپ، بايقاداموۆ كوشەسىنىڭ بويىمەن ءجۇردىم. سودان كەيىن ءال-فارابي-ساين-رىسقۇلوۆقا شىعىپ، «شاڭىراق» ىقشاماۋدانىنا قاراي بەت الدىق. پوليسيا ءبىزدى سول جەردە ۇستادى»، - دەدى ول. جابىرلەنۋشى كۇدىكتىنىڭ ءوزى قايدا بارۋ كەرەكتىگىن ايتىپ وتىرعانىن جانە جولدا تەلەفونىن الىپ، ەمحاناعا حابارلاسقانىن ايتتى. «ماعان دارىگەردى ولتىرگەنىن ايتىپ، كەيىن 30 مىڭ تەڭگە بەردى»، - دەيدى كۋاگەر.
بۇعان دەيىن يۋريي شۋمكوۆتىڭ ولىمىنە قاتىستى ءىستىڭ سوتقا جولدانعانى تۋرالى جازعان ەدىك.
ەسكە سالا كەتسەك، بيىلعى 4 ءساۋىر كۇنى الماتىدا دارىگەر ەمدەلۋشى پاسيەنتىنىڭ قولىنان قازا تاپتى. ونى كۇدىكتى اڭشى مىلتىعىمەن اتىپ تاستاعان. اسا اۋىر قىلمىس قالانىڭ بوستاندىق اۋدانىندا بولعان. كۇدىكتى قالادا ەنگىزىلگەن ارنايى جوسپار بارىسىندا الاتاۋ اۋدانى اۋماعىندا ۇستالدى. كەيىن ق ر دەنساۋلىق ساقتاۋ ءمينيسترى اجار عينيات يۋريي شۋمكوۆ پەن پاسيەنت اراسىندا قانداي دا ءبىر جانجالدىڭ بولماعانىن ايتتى.