وڭىرلىك كوممۋنيكاسيالار قىزمەتىنىڭ الاڭىندا الماتى كاسىپكەرلەر پالاتاسىنىڭ ديرەكتورى ايتۋار قوشمامبەتوۆ ءبىرقاتار ماسەلەلەردى ءتۇسىندىردى، دەپ حابارلايدى اlmaty-akshamy.kz
ا. قوشمامبەتوۆ ەندى نىسانداردا Ashyq قولدانۋ مىندەتتى ەمەستىگىن جانە بيزنەستىڭ ءوزىنىڭ شەشىمى بويىنشا ەرىكتى تۇردە جۇزەگە اسىرىلۋى مۇمكىن ەكەنىن حابارلادى. ءبىراق بولمەلەردەگى ماسكا تاعۋ رەجيمىن ەشكىم جويعان جوق.
سپيكەر اتاپ وتكەندەي، الماتىدا شەكتەۋ شارالارى كەزىندە Ashyq جوباسىنا 24 مىڭنان استام بيزنەس سۋبەكتىلەرى قاتىستى.
«Ashyq كوروناۆيرۋستىڭ تارالۋىن بولدىرماۋ جانە بيزنەس قاۋىمداستىعىن قولداۋ ماقساتىندا ەنگىزىلدى. ەپيدەميولوگيالىق احۋالدىڭ جاقسارۋىنا بايلانىستى كوروناۆيرۋستىق ينفەكسيانىڭ تارالۋىنا جول بەرمەۋ جونىندەگى ۆەدومستۆوارالىق كوميسسيا شەكتەۋ شارالارىن جەڭىلدەتۋ تۋرالى شەشىم قابىلدادى»، - دەدى ا.قوشمامبەتوۆ.
ول ەلىمىزدىڭ باس سانيتارلىق دارىگەرىنىڭ اعىمداعى جىلعى 14 ناۋرىزداعى قاۋلىسىنا سايكەس، ەپيدەميولوگيالىق قاۋىپ-قاتەردىڭ «سارى» جانە «جاسىل» ايماقتارىنداعى Ashyq جوباسىنىڭ قاتىسۋشىلارى ءوز قىزمەتىن شەكتەۋسىز جۇزەگە اسىراتىنىن اتاپ ءوتتى. قازىرگى ۋاقىتتا الماتى «جاسىل» ايماقتا ورنالاسقان.
«قىزىل ايماقتا ورنالاسقان ايماقتارداعى Ashyq قاتىسۋشىلارى ءوز قىزمەتىن وبەكتىلەردىڭ تولۋى بويىنشا شەكتەۋلەرمەن جۇزەگە اسىرا الادى. بۇدان باسقا، بيزنەس وكىلى ۆاكسينالانعان قىزمەتكەرلەر مەن كەلۋشىلەرگە قويىلاتىن تالاپتاردى ەنگىزۋ قاجەت پە، جوق پا، سونى ءوزى شەشەدى»، - دەپ اتاپ ءوتتى الماتى قالاسى كاسىپكەرلەر پالاتاسىنىڭ ديرەكتورى.
ايتۋار قوشمامبەتوۆتىڭ ايتۋىنشا، كوپتەگەن ازاماتتار بەتپەردە رەجيمىنە قاتىستى تارماقتى قاتە قابىلداعان. جابىق جەرلەردە جانە قوعامدىق كولىكتەردە ماسكا رەجيمى ءالى دە مىندەتتى بولىپ تابىلادى، سوندىقتان وسى تالاپتاردى ساقتاۋدى جالعاستىرۋ قاجەت.
بۇلاردان باسقا، ەلدىڭ باس سانيتارلىق دارىگەرىنىڭ قاۋلىسىمەن: كۇندىزگى رەجيمدە (قىزمەت كورسەتۋ وبەكتىلەرى) COVID-19-عا قارسى ۆاكسيناسيا الماعان قىزمەتكەرلەردى جۇمىسقا جىبەرۋگە شەكتەۋلەر، سونداي-اق ۆاحتالىق ادىسپەن جۇمىس ىستەيتىن ۇيىمداردىڭ قىزمەتكەرلەرى ءۇشىن ۆاحتاعا كىرۋ جانە شىعۋ كەزىندە پتر ادىسىمەن مىندەتتى زەرتحانالىق تەستىلەۋ الىنىپ تاستالدى.
ايتۋار قوشمامبەتوۆ باس سانيتارلىق دارىگەردىڭ قاۋلىسىنىڭ قوسىمشاسىندا «قىزىل» مارتەبەسى بار كەلۋشىلەردى انىقتاۋ شارالارى كورسەتىلگەنىن ايتتى.