الماتىدا ق ر قارۋلى كۇشتەرى باس اسكەري-مەديسينالىق باسقارماسىنىڭ ۇيىمداستىرۋىمەن اسكەري دارىگەرلەر مەن مەديسينالىق قىزمەتكەرلەردىڭ قاتىسۋىمەن ماڭىزدى ءىس-شارا ءوتتى. جيىنعا الماتى وڭىرلىك گارنيزونىنىڭ اسكەري بولىمدەرى، قارۋلى كۇشتەردىڭ تۇرلەرى مەن اسكەر تەكتەرى مەديسينالىق قىزمەتتەرىنىڭ باسشىلارى قاتىستى، دەپ حابارلايدى aqshamnews.kz
ءىس-شارا قورعانىس مينيسترلىگى اسكەري كلينيكالىق گوسپيتالىنىڭ بازاسىندا ۇيىمداستىرىلدى. تاجىريبەلىك ساباقتار 61993 اسكەري ءبولىمى مەن قۇرلىق اسكەرلەرى اسكەري ينستيتۋتىنىڭ نىساندارىندا وتكىزىلدى. بۇل ءىس-شارا اسكەري مەديسينالىق قىزمەتتىڭ ساپاسىن ارتتىرۋ، جاڭا ادىس-تاسىلدەردى ۇيرەتۋ جانە اسكەري سالادا دەنساۋلىق ساقتاۋ جۇيەسىن جەتىلدىرۋ ماقساتىندا ماڭىزدى ءرول اتقاردى.
جيىن بارىسىندا دارى-دارمەكتەر مەن مەديسينالىق جابدىقتاۋلاردى جوسپارلاۋ جانە ساتىپ الۋ ماسەلەلەرى تالقىلاندى. سونداي-اق، ەمدەۋ-الدىن الۋ شارالارىن ۇيىمداستىرۋ جانە مەديسينالىق جابدىقتىڭ ءتيىمدى پايدالانۋ جاي-كۇيى تۋرالى لاۋازىمدى تۇلعالار بايانداما جاسادى. اسكەري دارىگەرلەر امبۋلاتوريالىق جانە ستاسيونارلىق پاسيەنتتەرمەن جۇمىس ىستەۋ، جاراقات العان ناۋقاستاردىڭ ەسەپكە الۋ قۇجاتتاماسىن جۇرگىزۋ ماسەلەلەرىن پىسىقتادى. سونىمەن قاتار، اسكەري قىزمەتشىلەردىڭ، ونىڭ ىشىندە تاۋلىكتىك ناريادقا تۇسۋشىلەردىڭ پروفيلاكتيكالىق مەديسينالىق تەكسەرۋدەن وتكىزۋ ستاندارتتارى دا قاراستىرىلدى.
تاجىريبەلىك ساباقتاردا دارىلىك زاتتاردى ساقتاۋ، ەسەپكە الۋ جانە ەسەپتەن شىعارۋ تارتىپتەرى دە ەگجەي-تەگجەيلى تالقىلاندى. جيىنعا قاتىسۋشىلار دەنە شىنىقتىرۋ دايىندىعىنان سىناق تاپسىرىپ، ارنايى دايىندىق بويىنشا نورماتيۆتەردى ورىندادى. بۇل ءىس-شارا اسكەري مەديسينالىق قىزمەتتىڭ ساپاسىن جاقسارتۋعا، اسكەري قىزمەتشىلەردىڭ دەنساۋلىعىن قورعاۋعا جانە جالپى اسكەردىڭ جاۋىنگەرلىك دايىندىعىن نىعايتۋعا ماڭىزدى ۇلەس قوستى.