19 جەلتوقسان كۇنى قازاق ۇلتتىق قىزدار پەداگوگيكالىق ۋنيۆەرسيتەتىندە «وتباسىلىق زورلىق-زومبىلىقتىڭ الدىن الۋداعى زاماناۋي پسيحولوگيالىق كوزقاراستار: تەوريا جانە تاجىريبە» اتتى حالىقارالىق عىلىمي-تاجىريبەلىك كونفەرەنسيا ءوتتى، دەپ حابارلايدى aqshamnews.kz
كونفەرەنسياعا زەرتتەۋشى عالىمدار، كوللەدجدەر مەن جوعارى وقۋ ورىندارىنىڭ پروفەسسور-وقىتۋشىلارى، كوللەدجدەر مەن ءبىلىم بەرۋ مەكەمەلەرىنىڭ باسشىلارى مەن ماماندارى، پسيحولوگيالىق-پەداگوگيكالىق قولداۋ ورتالىقتارىنىڭ قىزمەتكەرلەرى، دوكتورانتتار، ماگيسترانتتار، ستۋدەنتتەر جانە جاس عالىمدار قاتىستى.
ماڭىزى جوعارى ءىس-شارانى QyzPU باسقارما ءتوراعاسى — رەكتورى، قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى مەن وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەسى گۇلميرا قاناي اشتى. كونفەرەنسيا تاقىرىبىنىڭ وزەكتىلىگىن ايتا وتىرىپ، رەكتور بيىلعى جىلى 50 جىلدىق مەرەيتويىن اتاپ وتەتىن پسيحولوگيا كافەدراسىنىڭ وسى ءىس-شارانى ۋنيۆەرسيتەت قابىرعاسىندا وتكىزۋىنىڭ ەرەكشە ماڭىزى بار ەكەنىن اتاپ ءوتتى.
حالىقارالىق عىلىمي-تاجىريبەلىك كونفەرەنسيادا قازاقستاندىق جانە شەتەلدىك بەلگىلى پسيحولوگتار، عالىمدار، ساراپشىلار، مەملەكەتتىك ورگاندار مەن ازاماتتىق قوعام وكىلدەرى قاتىسىپ، وتباسىلىق زورلىق-زومبىلىقتىڭ وزەكتى ماسەلەلەرىن، ونىڭ سەبەپتەرى مەن سالدارلارىن، الدىن-الۋدىڭ ادىستەرىن تالقىلادى.
«بۇگىنگى كۇنى «پسيحولوگيا» — ءبىزدىڭ قوعام ءۇشىن اسا ماڭىزدى جانە وزەكتى ماماندىق. اسىرەسە بىلىكتى مامانداردى دايارلاۋ قازىرگى ۋاقىتتا ەرەكشە ماڭىزعا يە. وتكەن جىلى «امانات» پارتياسى حالىققا پسيحولوگيالىق كومەك كورسەتۋدىڭ ءتيىمدى ينستيتۋتىن قۇرۋ ماسەلەسىنە ەرەكشە نازار اۋداردى. جىل بويى قازاق ۇلتتىق قىزدار پەداگوگيكالىق ۋنيۆەرسيتەتىنىڭ پسيحولوگيا كافەدراسىنىڭ قولداۋىمەن وسى باعىتتا بەلسەندى جۇمىس جۇرگىزىلىپ كەلەدى. ال ۋنيۆەرسيتەت قابىرعاسىندا ءوتىپ جاتقان بۇگىنگى حالىقارالىق عىلىمي-تاجىريبەلىك كونفەرەنسياعا ەستونيا، قىرعىزستان جانە تۇركيادان كەلگەن سپيكەرلەر قاتىسۋدا. بۇل ماماندار بالا تاربيەسى مەن اتا-انالارمەن جۇمىس ىستەۋ سالاسىندا تاجىريبەسى مول. ولار ءوز تاجىريبەلەرىمەن ءبولىسىپ، پىكىر الماسۋدا. كونفەرەنسياعا ستۋدەنتتەر دە قاتىسىپ وتىر. بۇل ءىس-شارا ستۋدەنتتەر ءۇشىن پايدالى اقپاراتقا تولى ءارى بولاشاق ماماندىقتارىندا قولدانۋعا قاجەتتى ماڭىزدى تاجىريبە بەرەدى»، - دەدى قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى، پروفەسسور زارەما شاۋكەنوۆا كاۋكەنوۆنا.
قازاق ۇلتتىق قىزدار پەداگوگيكالىق ۋنيۆەرسيتەتىنىڭ پروفەسسورى، پسيحولوگيا عىلىمدارىنىڭ دوكتورى حورلان شەريازدانوۆا ۋنيۆەرسيتەتتىڭ پسيحولوگيا كافەدراسىنىڭ وتباسى پسيحولوگياسىن دامىتۋعا قوسقان ۇلەسى مەن تاريحىنا توقتالدى.
«مەن پسيحولوگيا كافەدراسىندا قىزمەت ەتىپ كەلە جاتقانىما 45 جىل بولدى. وسى كافەدرادا مەنىڭ بۇكىل ءومىرىم ءوتتى. پسيحولوگيا ماماندىعى ۋنيۆەرسيتەتتىڭ ءبىلىم بەرۋ جۇيەسىنە 1997 جىلى قوسىلدى. سول ۋاقىتتان بەرى ءبىز مەملەكەتىمىز ءۇشىن جوعارى بىلىكتى پسيحولوگ ماماندارىن دايارلاۋدى باستادىق. ءبىز پسيحولوگيا ماماندارىنىڭ ءوز كاسىبىنە دەگەن سۇيىسپەنشىلىگىن ارتتىرۋعا، سونداي-اق ەلىمىز ءۇشىن جوعارى دارەجەلى مامانداردى دايارلاۋعا ءوز ۇلەسىمىزدى قوستىق. مەن پسيحولوگيا كافەدراسىنىڭ 50 جىل ىشىندە ۇلكەن جەتىستىكتەرگە جەتكەنىن ەرەكشە اتاپ وتكىم كەلەدى. وسى ۋاقىت ارالىعىندا ءبىزدىڭ كافەدرا قازاقستان رەسپۋبليكاسىندا ماڭىزدى جۇمىستار اتقاردى. ءبىز كوپتەگەن مەملەكەتتىك جوبالارعا قاتىسىپ، ولاردى ءبىلىم بەرۋ جۇيەسىنە ەنگىزدىك. بۇل جەتىستىكتەر كافەدرانىڭ كاسىبي شەبەرلىگى مەن ۇجىمدىق ەڭبەگىنىڭ ناتيجەسى دەپ بىلەمىن»، - دەدى حورلان شەريازدانوۆا توكتامىسوۆنا.
بۇل شارا وتباسىلىق زورلىق-زومبىلىق ماسەلەسىن تەوريالىق تۇرعىدان تالقىلاپ، ونى شەشۋدىڭ زاماناۋي ادىستەرىن تاجىريبەلىك دەڭگەيدە قاراستىرۋعا باعىتتالدى. كونفەرەنسيا حالىقارالىق تاجىريبە الماسۋ مەن ءقاۋىپسىز ورتا قۇرۋعا، ءوزارا قاتىناستاردىڭ جوعارى مادەني دەڭگەيى مەن پسيحولوگيالىق امان-ساۋلىقتى قالىپتاستىرۋعا باعىتتالعان بىرلەسكەن باستامالاردى ازىرلەۋ ءۇشىن ماڭىزدى پلاتفورما بولدى. ونىڭ قورىتىندىسىندا — وتباسىلىق اماندىقتى نىعايتۋعا، داعدارىستىق جاعدايلاردىڭ الدىن الۋعا جانە ساپالى پسيحولوگيالىق كومەك جۇيەسىن دامىتۋعا باعىتتالعان ۇسىنىستار ايتىلدى.
