تالدىقورعاندا سىبايلاس جەمقورلىققا قارسى مادەنيەت قالىپتاستىرۋعا ۇلەس قوسقان جۋرناليستەر ماراپاتتالدى

تالدىقورعاندا سىبايلاس جەمقورلىققا قارسى مادەنيەتتى قالىپتاستىرۋعا ەلەۋلى ۇلەس قوسقان جۋرناليستەر ماراپاتتالدى، دەپ حابارلايدى aqshamnews.kz. قوعام دەرتىنىڭ الدىن الۋ تاقىرىبىنا قالام تەربەگەن تىلشىلەردىڭ ۇزدىك ماقالالارى مەن بەينەمازمۇندارى ساراپقا ءتۇسىپ، جەڭىمپازدارعا سىي-قۇرمەت كورسەتىلدى. بايقاۋدى ۇيىمداستىرۋعا جەتىسۋ وبلىستىق قوعامدىق دامۋ باسقارماسى مەن «جەتىسۋ جاستار كونگرەسى» قوعامدىق بىرلەستىگى ۇيىتقى بولدى.

بايقاۋعا بيىل 20 شاقتى ماتەريال ۇسىنىلىپ، ولاردىڭ ىشىنەن ءادىل-قازىلار القاسى التاۋىن ماراپاتقا لايىق دەپ تانىدى. ءار جىل سايىن وتەتىن وبلىستىق بايقاۋعا جۋرناليستەر، بلوگەرلەر مەن مەديا قىزمەتكەرلەر بەلسەندى قاتىسىپ، سىبايلاس جەمقورلىقپەن كۇرەس جانە ونىڭ الدىن الۋ ماسەلەلەرىن كوتەردى.

• المات ەسەمبەكوۆ، الاكول اۋداندىق گازەتىنىڭ باس رەداكتورى، «بۇلىنگەننەن بۇلدىرگى الما» اتتى ماقالاسىمەن «ينتەرنەت-رەسۋرستاعى ۇزدىك ماقالا» اتالىمىن جەڭىپ الدى. ول ءوزىنىڭ ماقالاسىندا حالىقتى سىبايلاس جەمقورلىققا قارسى كۇرەسكە ىنتالاندىرۋ مەن باعىتتاۋدىڭ ماڭىزدىلىعىن اتاپ ءوتتى.

• مۇحتار كۇمىسبەك، «ەگەمەن قازاقستان» گازەتىنىڭ ءتىلشىسى، بايقاۋدىڭ «ەڭ ۇزدىك ماقالا» نوميناسياسىندا جەڭىسكە جەتتى.

• مۇرات جۇماباي، «جەتىسۋ» تەلەراديوكومپانياسىنىڭ رەداكتورى، «ۇزدىك بەينەروليك» اتالىمىنىڭ يەگەرى بولدى.

• قۋانىش قانات ۇلى، «Qazaqstan» ۇلتتىق ارناسىنىڭ ءتىلشىسى، «الەۋمەتتىك جەلىلەردى قامتۋ» بويىنشا ماراپاتتالدى.

• گۇلجان تۇرسىنوۆا، «Jetisu» گازەتىنىڭ ءتىلشىسى، «ۇزدىك جۋرناليستىك زەرتتەۋ» اتالىمىنا يە بولدى.

سالتاناتتى جيىندا سىبايلاس جەمقورلىقتىڭ الدىن الۋ مەن وعان قارسى كۇرەسكە ۇلەس قوسقان مەملەكەتتىك قىزمەتكەرلەر دە ەرەكشە قۇرمەتكە بولەندى.

بۇل بايقاۋ سىبايلاس جەمقورلىققا قارسى كۇرەستىڭ ماڭىزدىلىعىن حالىققا ءتۇسىندىرۋ، جۋرناليستەردىڭ قوعام الدىنداعى جاۋاپكەرشىلىگىن ارتتىرۋ ماقساتىندا وتكىزىلۋدە. جۋرناليستەردىڭ اۋقىمدى ءارى ماڭىزدى ماسەلەلەردى كوتەرۋى قوعامدا سىبايلاس جەمقورلىققا قارسى مادەنيەت قالىپتاستىرۋعا سەپتىگىن تيگىزەدى.