الماتى قالاسى تجد مەملەكەتتىك ءورت باقىلاۋ باسقارماسى باستىعىنىڭ ورىنباسارى ەركەبۇلان جۇماتايەۆ وڭىرلىك كوممۋنيكاسيالار قىزمەتىنىڭ بريفينگىندە ءسوز سويلەپ، قالانىڭ تابيعي اۋماقتارىنداعى ءورت ءجيى شىعاتىن ماۋسىمداعى جاعداي تۋرالى جان-جاقتى ەسەپ ۇسىندى.
26 ناۋرىزدان 20 قاراشاعا دەيىنگى ارالىق ءورت ءقاۋپى جوعارى ماۋسىم
جۇماتايەۆتىڭ ايتۋىنشا، ورمان شارۋاشىلىعى مەن جانۋارلار دۇنيەسى كوميتەتىنىڭ بۇيرىعىنا سايكەس قالا اۋماعىندا ءورت ءقاۋپى جوعارى كەزەڭ بەلگىلەنگەن. سونىڭ ىشىندە 21،6 مىڭ گەكتار ورمان-ساياباق اۋماعى ەرەكشە باقىلاۋعا الىنىپ، تابيعي ورتكە جول بەرىلگەن جوق.
ماماندار قۇرعاق ءشوپ پەن قامىستىڭ تۇتانۋ ءقاۋپى جوعارى 34 ۋچاسكەنى انىقتاعان. ءدال وسى اۋماقتارعا كۇندەلىكتى باقىلاۋ جۇرگىزىلەدى:
• 3 بەينەكامەرا ورناتىلعان، ونىڭ ەكەۋى ىلە-الاتاۋ ۇلتتىق پاركىنىڭ جەدەل كەزەكشىلىك پۋنكتىندە.
سونىمەن قاتار دەپارتامەنت كورشىلەس اۋداندار مەن اۋىلدىق وكرۋگتەرگە الدىن الۋ ءىس-شاراسىن كۇشەيتۋ قاجەتتىگى جونىندە حاتتار جولداپ جاتىر.
مونيتورينگ كەزەڭىندە تجد جانە پوليسيا قىزمەتكەرلەرى:
• 146 رەيد جۇرگىزدى؛
• حالىققا 7 مىڭنان استام جادىناما تاراتتى؛
• 169 وت جاعۋ فاكتىسىنىڭ جولىن كەستى؛
• 167 ادامدى جاۋاپقا تارتتى؛
• 355 گەكتاردان استام قۇرعاق دالا اۋماعىن تەكسەردى؛
• جاز بويى قوكتوبە ىقشاماۋدانى مەن الما-اراسان شاتقالىن ساقشىلار قورىپ ءجۇردى.
ەركەبۇلان جۇماتايەۆتىڭ حابارلاۋىنشا، ءورت قاۋىپسىزدىك رەجيمىن بۇزعانى ءۇشىن:
• 2 ادام اقبتك-نىڭ 505-بابى بويىنشا جاۋاپقا تارتىلعان؛
• 138 قۇقىقبۇزۋشى 410-باپ بويىنشا 4،8 ملن تەڭگە كولەمىندە ايىپپۇل تولەگەن؛
• جپق قىزمەتكەرلەرى قوسىمشا 3،1 ملن تەڭگە ايىپپۇل سالعان؛
• تاعى 16 ادام 336-باپ بويىنشا جاۋاپقا تارتىلعان.
تابيعي ورتتەرگە جەدەل دەن قويۋ ءۇشىن قۇرىلعان جەدەل جاساق قۇرامىندا:
• كۇندەلىكتى كەزەكشىلىك ەتەتىن 13 قىزمەتكەر؛
• 2 ساقشىلار كەشەنى؛
• بارلىعى 100 تج قىزمەتكەرى مەن قوسىمشا 130 اسكەري قىزمەتشى بار.
«ءبىزدىڭ باستى مىندەتىمىز — ءورتتىڭ الدىن الۋ»، — دەيدى تجD وكىلى.
جۇماتايەۆتىڭ ايتۋىنشا، الماتى قالاسىنىڭ تجد اسىرەسە حالىق كوپ دەمالاتىن، تۋريستەر ءجيى باراتىن ورىنداردا پروفيلاكتيكالىق جۇمىستى كۇشەيتۋدى جالعاستىرىپ جاتىر. ۇنەمى رەيد تە جۇرگىزىپ تۇرادى.
«تۇرعىنداردى اباي بولۋعا شاقىرامىز. كەز كەلگەن ۇقىپسىزدىقتىڭ ارتى ۇلكەن ورتكە ۇلاسۋى مۇمكىن»، — دەپ اتاپ ءوتتى ەركەبۇلان جۇماتايەۆ.