وڭىرلىك كوممۋنيكاسيالار قىزمەتىنىڭ باسپا ءسوز ورتالىعىندا الماتى وبلىسى بويىنشا 2025 جىلعى ءورت ءقاۋپى جوعارى ماۋسىمنىڭ قورىتىندىسى شىقتى. سپيكەر رەتىندە ورمان شارۋاشىلىعى جانە جانۋارلار دۇنيەسى جونىندەگى الماتى وبلىستىق اۋماقتىق ينسپەكسياسى باسشىسىنىڭ ورىنباسارى باقىتجان جۇمانوۆ ءسوز سويلەپ، ورمان ءورتىنىڭ بەتالىسى، كەلتىرىلگەن زالال مەن اتقارىلعان الدىن الۋ ءىس-شارالارى تۋرالى مالىمەتتەردى ۇسىندى.
ينسپەكسيانىڭ اقپاراتىنا سايكەس، 2025 جىلى وبلىستىڭ مەملەكەتتىك ورمان قورى اۋماعىندا جالپى اۋدانى 4 034 گەكتاردى قۇرايتىن 32 ورمان ءورتى تىركەلگەن. ونىڭ 1 776،8 گەكتارى – ورماندى جەرلەر. كەلتىرىلگەن جالپى زالال 9،6 ملن تەڭگەگە باعالانعان. 4 754،7 تەكشە مەتر اعاشتى ءورت شالعان.
تىركەلگەن وقيعانىڭ سەبەپتەرى:
• 6 ءورت دالا ءورتىنىڭ، سونىڭ ىشىندە اۋىل شارۋاشىلىعىنداعى ءورتتىڭ ورماندى شارپۋىنان شىققان؛
• 1 جاعداي – تۇرعىنداردىڭ كىناسىنەن؛
• 7 ءورت – نايزاعاي تۇسكەننەن؛
• 19 جاعداي – بەلگىسىز سەبەپتەرمەن.
باقىتجان جۇمانوۆتىڭ ايتۋىنشا، بيىل ورمان ءورتىنىڭ اۋماعى ەداۋىر قىسقارىپتى. 2024 جىلمەن سالىستىرعاندا 2 049 گا-عا ازايعان (6 083 گەكتاردان 4 034 گەكتارعا دەيىن).
ءورتتىڭ تارالۋىنا جول بەرمەۋ ءۇشىن مەملەكەتتىك ورمان پايدالانۋشىلار كەشەندى پروفيلاكتيكالىق جۇمىستار جۇرگىزگەن.
«2025 جىلى ورمان ءورتتىڭ الدىن الۋ ماقساتىندا وبلىستىڭ مەملەكەتتىك ورمان پايدالانۋشىلارى 601 شاقىرىم مينەرالدى جولاق جاسادى، 2 581 شاقىرىم قولدانىستاعى مينەرالدانعان جولاقتارعا كۇتىم جاسادى، 111 شاقىرىم ورتكە قارسى اجىراتۋ جولاقتارىن جۇرگىزدى، تابيعات قورعاۋ تاقىرىبىنداعى 919 انشلاگ ورناتتى. سونىمەن قاتار ءورت ءقاۋپى جوعارى ماۋسىم باستالعانعا دەيىن ىرگەلەس اۋماقتاردا 85 شاقىرىمداي جەردەگى شوپتەسىن وسىمدىكتەردى قولدان ورتتەپ شىقتى»، — دەدى سپيكەر.
سونىمەن بىرگە بارلىق ءىرى دەرەككە بايلانىستى قىزمەتتىك تەرگەۋ جۇرگىزىلگەنى اتاپ ءوتىلدى. دالادا شىققان ءورتتىڭ باسقا جەردى دە شارپۋى ءورتتىڭ تارالۋىنا نەگىزگى سەبەپ بولعان. قۇمدى، باتپاقتى، تاۋلى ايماقتارعا بارۋ دا ءبىراز قيىندىق كەلتىردى.
11 ورمان ءورتىنىڭ ماتەريالى كىنالى تۇلعالاردى انىقتاۋ ءۇشىن قۇقىق قورعاۋ ورگاندارىنا جولداندى. 2025 جىلى ءورت قاۋىپسىزدىگى ەرەجەلەرىن بۇزعان 75 فاكت انىقتالىپ، 75 اكىمشىلىك حاتتاما تولتىرىلدى. ايىپپۇلدىڭ جالپى سوماسى 14 ملن تەڭگەدەن اسىپ، ونىڭ 10،27 ملن تەڭگەسى 63 ادامنان ءوندىرىلدى.