الماتىدا ءورت ءقاۋپى جوعارى ماۋسىم 20 قاراشادا اياقتالدى. وسىعان وراي وڭىرلىك كوممۋنيكاسيالار قىزمەتىندە ىلە-الاتاۋ مەملەكەتتىك ۇلتتىق تابيعي پاركىنىڭ ماماندارى جۇرگىزىلگەن پروفيلاكتيكالىق ءىس-شارالار مەن تجد بولىمشەلەرىمەن بىرلەسىپ جاساعان رەيدتەر تۋرالى مالىمەت بەردى.
ورماندى قورعاۋ مەن ءورتتىڭ الدىن الۋ ينجەنەرى اقنيەت ساعدولدانوۆتىڭ ايتۋىنشا، ۇلتتىق پاركتەگى تابيعي ءورتتى سوندىرەتىن تەحنيكا مەن كادر جاعى تولىق قامتىلعان. اۋماعىندا I جانە II تيپتەگى ستانسيالار جۇمىس ىستەيدى، ولاردىڭ قۇرامىندا 4 ورمان ءورت ستانسياسىنىڭ باسشىسى، 33 ءورتسوندىرۋشى-ورمانشى مەن 4 راديووپەراتور بار. جەدەل ارەكەت ەتۋ ءۇشىن ارناۋلى تەحنيكا مەن كولىكتەر جۇمىلدىرىلعان: ءورت سوندىرەتىن ماشينالار، شاعىن ورمان ساقشىسى، تراكتورلار، سۋ تاسىمالداعىشتار، 34 ساقشى اۆتوكولىگى مەن 131 قىزمەت جىلقىسى بار. جانارماي قورى مەن قۇرال-جابدىق تا جەتكىلىكتى.
پروفيلاكتيكا اياسىندا 2025 جىلى مىنانداي جۇمىس ىستەلدى:
• 228،5 شاقىرىم كولەمىندە قارسى ءورت جولاعى جاڭارتىلىپ، جوندەلدى؛
• 78 شاقىرىم قارسى ءورت بەلدەۋىنىڭ ءشوبى شابىلدى؛
• 110 اقپاراتتىق انشلاگ جاڭارتىلىپ، جاڭادان ورناتىلدى؛
• ءورت قاۋىپسىزدىگى جونىندە 22 870 جادىناما تاراتىلدى؛
• تۋريستەر مەن دەمالۋشىلار اراسىندا تۇسىندىرمە جۇمىسى جۇرگىزىلدى.
الماتى مەن وبلىستىق تج دەپارتامەنتتەرى بىرلەسىپ 1 250 رەيد وتكىزدى. باق-تا ورمان ورتىنە جول بەرمەۋگە باعىتتالعان 36 ماتەريال جاريالاندى.
تجد، قۇتقارۋ قىزمەتتەرى، «قازاۆياورمانقورعاۋ»، «قازاۆياقۇتقارۋ» مەن تابيعاتتى قورعاۋ پوليسياسىمەن بىرلەسىپ تابيعي ورتتەردى جويۋ كەزىندەگى ءىس-قيمىلدى پىسىقتاۋعا ارنالعان «الاۋ-2025» وقۋ-جاتتىعۋى وتكىزىلدى.
«جىل باسىنان بەرى پارك اۋماعىندا 21 ورمان ءورتى تىركەلدى، ءورت شالعان اۋدان 26،9 گەكتاردى قۇراپ، ەكونوميكالىق شىعىن 524،4 مىڭ تەڭگە بولىپ باعالاندى. ءورت قاۋىپسىزدىگى ەرەجەسىن بۇزعانى ءۇشىن 53 ادام جاۋاپقا تارتىلىپ، ايىپپۇلدىڭ جالپى سوماسى 12،8 ملن تەڭگەنى قۇرادى، ونىڭ 8،9 ملن تەڭگەدەن استامى ءوندىرىلدى»، – دەپ تولىقتىردى اقنيەت ساعدولدانوۆ.
ۇلتتىق پارك وكىلدەرى كەلگەن-كەتكەن ادامداردى تازالىق پەن ءتارتىپتى ساقتاۋعا شاقىرادى.