الماتىدا ورتەنگەن ۇيدەن ەر ادامنىڭ ءمايىتى تابىلدى

مايىتتەن زورلىق بەلگىلەرى تابىلعان

وستروۋموۆا كوشەسىندەگى ۇيلەردىڭ بىرىندە ءورت شىقتى. ءورت تۋرالى حابارلاما “101” پۋلتىنە كەشكى ساعات 21:00 شاماسىندا كەلىپ تۇسكەن، دەپ حابارلايدى Almaty-akshamy.kz Polisia.kz-كە سىلتەمە جاساپ.

«ءورتتى لوكاليزاسيالاعاننان كەيىن بولمەلەردىڭ بىرىنەن زورلىق-زومبىلىق بەلگىلەرى بار ەر ادامنىڭ ءمايىتى تابىلدى. كەيىن بۇل – ءۇيدىڭ يەسى، 38 جاستاعى ك.ەسىمدى ازامات ەكەندىگى انىقتالدى. بۇرىن جۇك كولىگىنىڭ جۇرگىزۋشىسى بولىپ جۇمىس ىستەگەن. ءبىراق دەنساۋلىعىنا بايلانىستى بىرنەشە ايدان بەرى ەش جەردە جۇمىس جاساماعان. سوت-مەديسينالىق ساراپتاماسىنىڭ قورىتىندىسىنا سايكەس، ادامنىڭ ولىمىنە – مويىننىڭ كەسىلگەن جاراقاتى، سول جاقتاعى كەۋدە تۇسىنداعى پىشاق جاراقاتى، ءىشتىڭ جانە سول جاق بۇعانا ايماعىنداعى ەنىپ كەتكەن پىشاق جاراقاتتارى جانە ودان كەيىنگى ءمايىتتى ورتەۋ سەبەپ بولعان. تەرگەۋ بارىسىندا 44 جاستاعى پ.ەسىمدى ازامات انىقتالدى، ول قىلمىس جاسالماس بۇرىن جابىرلەنۋشىنىڭ ۇيىنە قوناققا كەلگەن»، – دەدى تۇركسىب اۋداندىق پب جانىنداعى پوليسيا ءبولىمىنىڭ باستىعى مەيىرحان جاڭابايەۆ.

ەر ادامداردىڭ الكوگولدىك ىشىمدىك ىشكەنى انىقتالدى. ولاردىڭ اراسىندا جانجال تۋىنداپ، ونىڭ بارىسىندا پ.ەسىمدى ازامات ءۇي يەسىنە بىرنەشە رەت پىشاق جاراقاتىن سالعان. 

«قىلمىستىڭ ءىزىن جاسىرۋ ءۇشىن كۇدىكتى ۇيگە ءورت قويعان. اتالعان دەرەك بويىنشا ق ر قك-نىڭ 99-بابى 1-بولىگىنە سايكەس قىلمىستىق ءىس قوزعالدى. جاۋاپ الۋ كەزىندە ۇستالعان ادام اس ءۇي پىشاعىن ءبىرىنشى بولىپ ءۇي يەسىنىڭ ۇستاعانىن، ول ونىڭ قولىنان جۇلىپ الىپ، وعان بىرنەشە رەت ءولىمشى سوققىلار جاساعانىن ايتتى. كىسى ءولتىرۋدىڭ ناقتى ءمان-جايى تەرگەۋ بارىسىندا انىقتالاتىن بولادى»، – دەدى م.جاڭابايەۆ.