2025 جىلعى 26–28 قىركۇيەك كۇندەرى الماتى قالاسىندا ورتالىق ازيا ەلدەرىنىڭ «ورگانيك ەكسپو-2025» وڭىرلىك فورۋمى وتەدى، - دەپ حابارلايدى Aqshamnews.kz.
ءىس-شارانى قازاقستان رەسپۋبليكاسى اۋىل شارۋاشىلىعى مينيسترلىگى، س. سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتى جانە «ورگانيك ەكسپو-2025» ۇيىمداستىرۋ كوميتەتى ۇيىمداستىرادى.
فورۋم تۇراقتى جانە ورگانيكالىق اۋىل شارۋاشىلىعىن دامىتۋ، ەكولوگيالىق ءقاۋىپسىز تەحنولوگيالاردى ەنگىزۋ، سونداي-اق حالىقارالىق ىنتىماقتاستىقتى كەڭەيتۋ ماسەلەلەرىن تالقىلاۋعا ارنالعان الاڭعا اينالادى.
نەگىزگى تاقىرىپتار قاتارىندا:
•اۋىلدىق اۋماقتاردى دامىتۋ ءۇشىن ورگانيكالىق جانە رەگەنەراتيۆتى اۋىل شارۋاشىلىعىن قولداۋ؛
•فەرمەرلەر ءۇشىن جاڭا ەكونوميكالىق مۇمكىندىكتەر قۇرۋ جانە «جاسىل ەكونوميكا» دامىتۋ؛
•تابيعاتتى ساقتايتىن تەحنولوگيالاردى ەنگىزۋ؛
•بيوالۋانتۇرلىلىكتى ساقتاۋ جانە اۋىل شارۋاشىلىعى ءوندىرىسىنىڭ تيىمدىلىگىن ارتتىرۋ؛
•اگروسەكتورداعى كومىرتەك ءىزىن ازايتۋ جانە «جاسىل» قارجىلاندىرۋ تەتىكتەرىن دامىتۋ.
سونىمەن قاتار قاتىسۋشىلار جاستار مەن جاس مامانداردى ءبىلىم بەرۋ باعدارلامالارى ارقىلى قولداۋ، يننوۆاسيالار مەن عىلىمي ازىرلەمەلەردى تارتۋ، ءوڭىردىڭ ەكولوگيالىق جانە كليماتتىق سىن-قاتەرلەرىن ازايتۋ ءۇشىن حالىقارالىق ارىپتەستىكتى نىعايتۋ ماسەلەلەرىن تالقىلايدى.
فورۋم باعدارلاماسىندا مەملەكەتتىك ورگاندار، حالىقارالىق ۇيىمدار، عالىمدار، بيزنەس جانە ازاماتتىق قوعام وكىلدەرىنىڭ قاتىسۋىمەن پلەنارلىق وتىرىس، تاقىرىپتىق باعىتتار بويىنشا سەكسيالىق ماجىلىستەر وتەدى.
سونىمەن بىرگە قازاق ەگىنشىلىك جانە وسىمدىك شارۋاشىلىعى عىلىمي-زەرتتەۋ ينستيتۋتىندا ورگانيكالىق ءونىم وندىرۋشىلەرىمەن كەزدەسۋلەر، Organic Village فەرماسىندا (المالىباق جانە بەرەكە اۋىلدارى) شەبەرلىك ساباقتارى، سونداي-اق Caspian University الدىنداعى الاڭدا ورگانيكالىق ونىمدەردىڭ كورمە-جارمەڭكەسى ۇيىمداستىرىلادى.
فورۋمنىڭ باستى وقيعالارىنىڭ ءبىرى – «ورگانيك كاراۆان»، وندا قولونەرشىلەر، فەرمەرلەر، كاسىپكەرلەر جانە شىعارماشىلىق قاۋىمداستىقتار تاجىريبە الماسىپ، ىسكەرلىك بايلانىستار ورناتا الادى.
باعدارلاما اياسىندا الماتى وبلىسىنداعى سەرتيفيكاتتالعان ورگانيكالىق فەرماعا ساپار ۇيىمداستىرىلىپ، تۇراقتى اۋىل شارۋاشىلىعىنىڭ ۇزدىك تاجىريبەلەرى مەن جاڭا تەحنولوگيالارى ۇسىنىلادى.