مەدەۋدەگى وتپەن كۇرەس كەزىندە قۇتقارۋشىلاردىڭ ءبىرى كوز جۇمدى.
الماتى قالاسىندا مەدەۋدە تۇتانعان وتپەن كۇرەس كەزىندە ءورت ءسوندىرۋشى ارسلان قۇرمانبەكوۆ مەرت بولدى، دەپ حابارلايدى اlmaty-akshamy.kz تجم باسپا ءسوز قىزمەتىنە سىلتەمە جاساپ.
«كەشە، 8 مامىر كۇنى قىزمەتتىك بورىشىن اتقارۋ كەزىندە، الماتى قالاسىندا ىلە-الاتاۋ مەملەكەتتىك ۇلتتىق تابيعي پاركى اۋماعىنداعى تاۋ بوكتەرىندە ءورت سوندىرۋگە جۇمىلدىرىلعان توپ قۇرامىندا بولعان الماتى قالاسى توتەنشە جاعدايلار دەپارتامەنتى ءورت ءسوندىرۋ جانە اپاتتىق-قۇتقارۋ قىزمەتىنىڭ قىزمەتكەرى، 7ء-ورت ءسوندىرۋ ءبولىمىنىڭ اعا ءورت ءسوندىرۋ-قۇتقارۋشىسى، ازاماتتىق قورعاۋ سەرجانتى قۇرمانبەكوۆ ارسلان جولداسبەك ۇلى جانىپ جاتقان اعاش دىڭگەگىنىڭ قۇلاۋى سالدارىنان كوز جۇمدى».
ءورت ءسوندىرۋشى ارسلان قۇرمانبەكوۆ الماتى وبلىسىندا 1994 جىلى 23 تامىزدا تۋعان. ازاماتتىق قورعاۋ ورگاندارىندا 2015 جىلدىڭ 14 جەلتوقسانىنان ەڭبەك ەتىپ كەلدى.
«توتەنشە جاعدايلار مينيسترلىگى ارسلان جولداسبەك ۇلىنىڭ تۋعاندارى مەن جاقىندارىنا قايعىرا كوڭىل ايتادى. ونى كاسىبي مامان رەتىندە ءاردايىم ەسكە الاتىن بولامىز.
ارسلان جاۋاپتى قىزمەتكەر، جوعارى كاسىبي جانە ساۋاتتى مامان بولدى. ۇجىمى ونى ىنتا-جىگەرى، ادالدىعى جانە ماماندىعىنا دەگەن ماحابباتى ءۇشىن باعالادى.
تجم قازا بولعان ءورت ءسوندىرۋشىنىڭ وتباسىنا جان-جاقتى كومەك مەن قولداۋ كورسەتەتىن بولادى»، - دەلىنگەن مينيسترلىك مالىمەتىندە.