كونگو حالقى ازا تۇتىپ جاتىر.
نوسەر جاڭبىردان وڭتۇستىك كيۆۋ پروۆينسياسىنىڭ وزەندەرى ارناسىنان شىعىپ، جاعاداعى ۇيلەردى شايىپ كەتتى.
كونگو دەموكراتيالىق رەسپۋبليكاسىندا سۋ تاسقىنى مەن كوشكىن سالدارىنان كەم دەگەندە 394 ادام قازا تاپتى، دەپ حابارلايدى اlmaty-akshamy.kz dw.com سايتىنا سىلتەمە جاساپ.
مۇنداي اقپاراتتى ەلدىڭ شىعىسىنداعى ەڭ كوپ زارداپ شەككەن كالەحە وكرۋگىنىڭ اكىمشىلىك قىزمەتكەرى توماس باكەنگا بەردى.
اپتانىڭ سوڭىندا جاۋعان قاتتى جاڭبىر وڭتۇستىك كيۆۋ پروۆينسياسىنداعى وزەندەردىڭ ارناسىنان شىعىپ، كەم دەگەندە جۇزدەگەن ۇيلەردىڭ شايىلىپ كەتۋىنە سەبەپ بولدى. ەلدە 8 مامىردا قازا تاپقاندار ءۇشىن ءبىر كۇندىك ازا تۇتۋ جاريالاندى.
وڭتۇستىك كيۆۋ پروۆينسياسىندا دا، كورشىلەس رۋاندا مەن ۋگاندادا دا مۇنداي تابيعي قۇبىلىس سيرەك ەمەس. رۋانداداعى سوڭعى سۋ تاسقىنى كەم دەگەندە 127 ادامنىڭ ءومىرىن قيدى. ادەتتە سۋ تاسقىنى ايماقتا جىلىنا ەكى رەت كەلەتىن جاڭبىرلى ماۋسىمدارمەن بىرگە جۇرەدى.