كەشە، 15 تامىزدا ورتالىق ستاديوندا ءورت-قۇتقارۋ سپورتىنان ۇلدار مەن جاسوسپىرىمدەر اراسىنداعى XIII الەم چەمپيوناتىنىڭ جانە قىزدار مەن جاسوسپىرىمدەر اراسىنداعى IX الەم چەمپيوناتىنىڭ سالتاناتتى اشىلۋ ءراسىمى ءوتتى.
جارىسقا قازاقستاندىقتاردان باسقا بەلارۋس، بولگاريا، قازاقستان، رەسەي، سلوۆاكيا، چەحيا كوماندالارى قاتىستى. سونىمەن قاتار، باقىلاۋشىلار رەتىندە ساۋد ارابياسىنىڭ وكىلدەرى كەلدى، دەپ حابارلايدى aqshamnews.kz.
سالتاناتتى ءىس-شارانى ق ر توتەنشە جاعدايلار ۆيسە-مينيسترى ەرلان نۇرپەيىسوۆ اشتى. چەمپيوناتتىڭ ۇيىمداستىرۋشىلارى مەن قاتىسۋشىلارىن قۇتتىقتاي وتىرىپ، ول الداعى ءىس-شارا جوعارى دەڭگەيدە وتەتىنىنە جانە قۇتقارۋشى سپورتشىلار ءۇشىن ناعىز مەرەكە بولاتىنىنا سەنىم ءبىلدىردى.
حالىقارالىق ءورت سوندىرۋشىلەر مەن قۇتقارۋشىلار سپورت فەدەراسياسىنىڭ پرەزيدەنتى الەكساندر چۋپريان، حالىقارالىق ءورت سوندىرۋشىلەر مەن قۇتقارۋشىلار سپورت فەدەراسياسىنىڭ اتقارۋشى كوميتەتىنىڭ ديرەكتورى اندرەي كالينين، سونداي اق جارىستىڭ باس تورەشىسى سەرگەي باكيروۆ قۇتتىقتاۋ سوزدەرىن سويلەدى.
اتاپ ءوتۋ قاجەت، ەلىمىزدە جاسوسپىرىمدەر اراسىنداعى الەم چەمپيوناتى العاش رەت وتكىزىلۋدە.
الەم چەمپيوناتىنىڭ ەكىنشى جارىس كۇنىندە كوماندالار كەدەرگىلەرى بار جولاقتىڭ 100 مەترىن ەڭسەرىپ سايىسقا تۇسەدى.
كەلەسى كۇندەرى ءۇشىنشىسى - 4ح100 مەترلىك ءورت ءسوندىرۋ ەستافەتاسى.
ءتورتىنشىسى - ءورت ءسوندىرۋ موتوپومپاسىنان جاۋىنگەرلىك قانات جايۋ بويىنشا سايىستار وتەدى.
قازاقستاندا اتالعان ساناتتاعى سپورتتىق ءىس-شارا ءۇشىنشى رەت وتۋدە. 2014 جىلى الەم بىرىنشىلىگى العاش رەت الماتى قالاسىندا جانە 2021 جىلى قاراعاندى قالاسىندا وتكەن. ايتا كەتەيىك، ەلىمىزدە ۇلدار مەن قىزدار، جاسوسپىرىمدەر اراسىنداعى الەم چەمپيوناتتارى العاش رەت وتكىزىلۋدە.
ءورت-قۇتقارۋ سپورتى بويىنشا الەم چەمپيوناتتارىن وتكىزۋ ءارتۇرلى ەلدەردىڭ ازاماتتىق قورعاۋ ورگاندارى سالاسىنداعى دوستىق بايلانىستار مەن ىنتىماقتاستىقتى نىعايتۋعا باعىتتالعان.