التىنشى رەت وتكەن ءداستۇرلى شارا سەلەزنيەۆ اتىنداعى حورەوگرافيالىق ۋچيليششەسىنىڭ 90 جىلدىعىنا ارنالدى.
ءۇش كۇندىك فەستيۆالدا جاس بالەت بيشىلەرى ونەر كورسەتىپ، ماماندار كاسىبي ونەردى دامىتۋ بويىنشا شىعارماشىلىق تاجىريبە الماسادى. الماتى تەاترىنىڭ ساحناسىندا كاسىبي بي ۇجىمدارى مەن بالەت ارتىستەرى ونەر كورسەتتى، دەپ حابارلايدى Almaty-akshamy.kz 24.kz-كە سىلتەمە جاساپ.
بيىل «ورلەۋ» فەستيۆالىنە قازاقستان، وزبەكستان، قىرعىزستان، تۇركيا، رەسەي ەلدەرىنىڭ 8 حورەوگرافيالىق وقۋ ورنىنىڭ جاس تالانتتارى قاتىسۋدا. سونىمەن قاتار، بي فورۋمىنا حالىقارالىق دەڭگەيدەگى جەتەكشى بالەت ارتىستەرى كەلدى.
«ءبىز ءۇشىن بۇل باعا جەتپەس تاجىريبە. بۇل بۇكىل پروفەسسورلىق-وقىتۋشىلىق قۇرامعا حورەوگرافيالىق ءبىلىم بەرۋ سالاسىنداعى جۇمىستى جانداندىرۋعا، ءبىتىرۋشى ستۋدەنتتەرىمىزدىڭ كاسىبي دەڭگەيىن كوتەرۋگە جاڭا سەرپىن بەرەدى»، - دەيدى ا.سەلەزنوۆ اتىنداعى الماتى حورەوگرافيالىق ۋچيليششەسى ديرەكتورىنىڭ مىندەتىن اتقارۋشى مۇرات تۇكەيەۆ.
فەستيۆالدىڭ ءبىرىنشى كۇنى 90 جىلدىق تاريحى بار قازاقستاننىڭ تۇڭعىش بالەت مەكتەبىنىڭ ستۋدەنتتەرى ەسەپ بەرۋ كونسەرتىن قويدى. كورەرمەندەرگە ءبىر اكتىلى تولىقمەتراجدى ەكى بالەت ۇسىنىلدى.
«فەستيۆال قوناقتارى «تۇران دالا - قىران دالا» جانە «بولەرو» بالەتىن تاماشالادى. ءبىزدىڭ شاكىرتتەرىمىز ەلىمىزدىڭ ساحنالارىندا عانا ەمەس، شەتەلدىڭ تەاترلارىندا ونەر كورسەتىپ ءجۇر. حالىقارالىق كونكۋرستاردا جۇلدەلى ورىنداردان كورىنۋدە. بۇل قازاقستانداعى كاسىبي حورەوگرافيانىڭ كورىنىسى، بىلىكتى ۇستازداردىڭ ەڭبەگى»، - دەيدى ا.سەلەزنوۆ اتىنداعى الماتى حورەوگرافيالىق ۋچيليششەسى ديرەكتورىنىڭ مىندەتىن اتقارۋشى مۇرات تۇكەيەۆ.
90 جىلدىق تاريحى بار سەلەزنيەۆ مەكتەبىنەن بۇگىنگە دەيىن 2 مىڭنان استام تۇلەك ونەرگە جولداما الدى. ولاردىڭ قاتارىندا حالىق ارتىستەرى، ەڭبەك سىڭىرگەن ونەر قايراتكەرلەرى بار. حالىقارالىق بالەت جانە بي بايقاۋلارىنىڭ لاۋرەاتتارى دا وسى ۇستاحانادا شىڭدالدى. سولاردىڭ ءبىرى كراسنويارسك مەملەكەتتىك وپرەا جانە بالەت تەاتىرىنىڭ پريما بالەريناسى ناتاليا چەحوۆسكايا سەلەزنيەۆ ۋچيليششەسىنىڭ تۇلەگى.
«مەكتەپ ماعان وتە جاقسى ومىرلىك جولداما بەردى. مەن بۇل ءۇشىن وتە ريزامىن جانە مەكتەبىمدى ءارقاشان ماقتان تۇتامىن. ونەر مەكتەبىنىڭ بالەت الەمىندە ءوز ورنى بار. حالىقارالىق جارىستاردا ءوزىم تۇلەپ ۇشقان مەكتەبىمنىڭ جەتىستىكتەرىن كورىپ، قۋانامىن. مۇندا كاسىبي ماماندار بار، بي ءداستۇرى ساقتالعان. بۇل وتە ماڭىزدى»، - دەيدى ا.سەلەزنيەۆ اتىنداعى الماتى حورەوگرافيالىق ۋچيليششەسىنىڭ تۇلەگى ناتاليا چەحوۆسكايا.
«ورلەۋ» حالىقارالىق فەستيۆالىنىڭ ەكىنشى كۇنى بالەت ونەرى جۇلدىزدارىنىڭ شەبەرلىك ساباعىنا ارنالدى. ال ونەر مەرەكەسىن فەستيۆال قوناقتارى مەن قازاقستاننىڭ جەتەكشى بي ۇجىمدارىنىڭ قاتىسۋىمەن وتەتىن «بالەت جۇلدىزدارى» گالا-كونسەرتى قورىتىندىلايدى.