ەرتەڭ ورتا ءبىلىم بەرەتىن بارلىق ۇيىمداردا وقۋ جىلى اياقتالادى.
الماتى قالاسىنىڭ ءبىلىم بەرۋ ساپاسىن قامتاماسىز ەتۋ دەپارتامەنتىنىڭ باسشىسى گۇلنار ەرمەكبايەۆا وڭىرلىك كوممۋنيكاسيالار قىزمەتىنىڭ بريفينگىندە بيىلعى جىلى مەكتەپ وقۋشىلارى ءۇشىن ەمتيحاندار مەن مەكتەپ ءبىتىرۋ كەشى قالاي وتكىزىلەتىنى تۋرالى ايتىپ بەردى، دەپ حابارلايدى Almaty-akshamy.kz
سپيكەر ءبىلىم بەرۋ ساپاسىن ارتتىرۋ جانە پاندەميا، شەكتەۋ شارالارى كەزەڭىندە جىبەرىلگەن بىلىمدەگى ولقىلىقتاردىڭ ورنىن تولتىرۋ ماقساتىندا 2022 جىلعى 26 مامىر مەن 17 ماۋسىم ارالىعىندا 1-8، 10 سىنىپ وقۋشىلارى ءۇشىن ءاربىر ءبىلىم بەرۋ ۇيىمىنىڭ جازعى مەكتەبىندە وقىتۋ ۇيىمداستىرىلاتىنىن اتاپ ءوتتى.
9، 11-سىنىپ وقۋشىلارى ءۇشىن قورىتىندى ەمتيحاندار بەكىتىلگەن كەستەگە سايكەس، 9-سىنىپتاردا 28 مامىردان 6 ماۋسىمعا دەيىن، 11-سىنىپتاردا 27 مامىردان 10 ماۋسىمعا دەيىن وتكىزىلەدى. 11-سىنىپ تۇلەكتەرى قازاقستان تاريحى بويىنشا اۋىزشا ەمتيحان تاپسىرادى.
«ق ر ءبىلىم جانە عىلىم مينيسترلىگىنىڭ مەكتەپ ءبىتىرۋ كەشىن وتكىزۋ بويىنشا ۇسىنىستارىنا نازار اۋدارعىم كەلەدى. بيىل مەكتەپ ءبىتىرۋ كەشى مەكتەپ قابىرعاسىندا بولادى، ال اتتەستاتتاردى تاپسىرۋ سالتاناتى 16-17 ماۋسىمدا وتەدى. مەكتەپتى بىتىرۋگە قاتىستى بارلىق شارالار مەكتەپ قابىرعاسىندا وتكىزىلۋى كەرەك. تۇلەكتەردىڭ اتا-انالارىنا بۇل ءىس-شارالارعا شىعىندانۋلارىنىڭ تيىمسىزدىگى تۋرالى ەسكەرتەمىز»، - دەدى گ. ەرمەكبايەۆا.
ونىڭ ايتۋىنشا، مەكتەپ ءبىتىرۋ كەشىن ءبىلىم بەرۋ ۇيىمى ءوز كۇشىمەن ۇيىمداستىرادى. ءىس-شاراعا انيماتورلاردى، مەرەكەلىك اگەنتتىكتەردى، اقىلى ارتىستەردى شاقىرۋعا، مەرەكەلىك وتىرىستار ۇيىمداستىرۋعا، جالعا الىنعان اۆتوموبيلدەردە ەكسكۋرسيالار وتكىزۋگە جول بەرىلمەيدى.
«سوندىقتان مۇعالىمدەرگە، مەكتەپكە سىيلىقتار جيناۋعا قاتاڭ تىيىم سالىنعانىن اتاپ وتكىم كەلەدى. مەكتەپ ءبىتىرۋ ءىس-شارالارىن اياقتاۋ جانە وتكىزۋ ماسەلەلەرى بويىنشا دەپارتامەنتتىڭ call-ورتالىعىنا كوپتەگەن سۇراقتار كەلىپ تۇسۋدە. وندا بارلىعىنا وقۋ جىلىنىڭ اياقتالۋى بويىنشا تۇسىنىكتەمە بەرەمىز»، - دەپ اتاپ ءوتتى الماتى قالاسىنىڭ ءبىلىم بەرۋ ساپاسىن قامتاماسىز ەتۋ دەپارتامەنتىنىڭ باسشىسى.