ۇلتتىق ءبىرىڭعاي تەستىلەۋ 16 مامىردا باستالدى، 5 شىلدەدە اياقتالادى.
ۇبت تاپسىرۋ كەزىندە اشىقتىق پەن اكادەميالىق ادالدىقتى ساقتاۋعا ەرەكشە كوڭىل بولىنەدى. بۇل تۋرالى وڭىرلىك كوممۋنيكاسيالار قىزمەتىنىڭ بريفينگىندە الماتى قالاسى ءبىلىم ساپاسىن قامتاماسىز ەتۋ دەپارتامەنتىنىڭ باسشىسى گۇلنار ەرمەكبايەۆا مالىمدەدى، دەپ حابارلايدى Almaty-akshamy.kz.
سپيكەر بيىلعى جىلدان باستاپ تالاپكەرلەرگە ۇبت تاپسىرۋعا جانە گرانتقا تۇسۋگە ەكى مۇمكىندىك بەرىلەتىنىن اتاپ ءوتتى. ەكى مۇمكىندىكتىڭ كومەگىمەن مامانداندىرىلعان پاندەردىڭ تەك ءبىر كومبيناسياسىن تاڭداۋعا بولادى. ۇلتتىق ءبىرىڭعاي تەستىلەۋ 16 مامىردا باستالدى، 5 شىلدەدە اياقتالادى. وسى ۋاقىت ارالىعىندا وتكەن جىلدارداعى مەكتەپ، تجكب تۇلەكتەرى، شارتتى تۇردە وقىپ جاتقاندار جانە قانداستار دا قاتىسۋعا قۇقىلى.
«وسى جىلدان باستاپ تالاپكەرلەردىڭ تەستىلىك نۇسقاسى اكادەميالىق ادالدىقتى ساقتاۋ ءۇشىن تاڭبالاناتىنىنا نازار اۋدارعىم كەلەدى (ءاربىر قاتىسۋشى ءۇشىن جەكە). ەرەجە بۇزىلعان جانە تەست تاپسىرمالارىن اۋديتوريادان تىس شىعارۋعا ارەكەت جاسالعان جاعدايدا، ۇلتتىق تەستىلەۋ ورتالىعى ءتارتىپ بۇزۋشىلاردى انىقتاپ، ولاردىڭ تەستىلەۋ ناتيجەلەرىنىڭ كۇشىن جويادى»، - دەپ اتاپ ءوتتى گۇلنار ەرمەكبايەۆا.
پاندەردىڭ سانى وزگەرىسسىز قالادى. ال تەست تاپسىرمالارىنىڭ سانى – 120. (ونىڭ ىشىندە قازاقستان تاريحىنان - 15، ماتەماتيكالىق ساۋاتتىلىقتان - 15، وقۋ ساۋاتتىلىعىنان - 20 جانە ەكى بەيىندىك پاننەن – 35). ەڭ جوعارعى ۇپاي سانى – 140.
الماتى قالاسى ءبىلىم ساپاسىن قامتاماسىز ەتۋ دەپارتامەنتىنىڭ باسشىسى ەرەكشە ءبىلىم بەرۋدى قاجەت ەتەتىن تالاپكەرلەرگە قولايلى جاعداي جاساۋ ءۇشىن العاش رەت نەگىزگى 240 مينۋتقا قوسىمشا تاعى 40 مينۋت بەرىلگەندىگى تۋرالى ايتتى. سونىمەن بىرگە ولار ءۇشىن تەست نۇسقالارى سۋرەتتەرسىز، دياگراممالارسىز جانە سىزبالارسىز ازىرلەندى.
سپيكەردىڭ ايتۋىنشا، گرانتقا ءتۇسۋ ءۇشىن ۇبت تاپسىرۋدىڭ ەكى مۇمكىندىگى تيىمدىلىكتى ارتتىرادى جانە بالالاردىڭ كۇيزەلىسىن ازايتادى. جىل سايىن تەست تاپسىرمالارىنىڭ بازاسى 30%-عا جاڭارتىلىپ وتىرادى. بۇل رەتتە رەپرودۋكتيۆتى سيپاتتاعى ەمەس، شىعارماشىلىق سيپاتتاعى، زەرتتەۋ، سينتەزدەۋ جانە تالداۋ قابىلەتىنە، ياعني وقۋشىلاردىڭ ءوز بىلىمدەرىن ءىس جۇزىندە قولدانۋىنا ارنالعان، جاۋاپتارى جاتتالاتىن ەمەس، سۇراقتار ەنگىزىلەدى. ۇبت تاپسىرۋدىڭ ەكى ارەكەتى دە تەگىن بولادى جانە ولاردىڭ ناتيجەلەرى گرانت الۋ كونكۋرسىنا قاتىسۋعا جارامدى بولادى.
ۇبت كەزىندە كومپيۋتەر ەكرانىندا كالكۋلياتور، مەندەلەيەۆ كەستەسى جانە مەتالداردىڭ ءبىرقاتار بەلسەندىلىگى قوسىلعان تۇزداردىڭ ەرىگىشتىگى كەستەسى قولجەتىمدى بولادى.
ۇمىتكەرلەر تەستىلەۋ اياقتالعاننان كەيىن 30 مينۋت ىشىندە اپەللياسياعا بەرە الادى. سەرتيفيكات اپپەلياسيا تۋرالى شەشىم قابىلدانعاننان كەيىن تەستىلەنۋشىنىڭ جەكە كابينەتىندە قولجەتىمدى بولادى.
ۇبت كەزىندە اشىقتىق پەن اكادەميالىق ادالدىقتى ساقتاۋعا ەرەكشە كوڭىل بولىنەدى. بيىل اقپاراتتىق قاۋىپسىزدىكتى قامتاماسىز ەتۋ ماقساتىندا ۇبت «1 كومپيۋتەر – 2 كامەرا - 1 تەستىلەنۋشى» قاعيداسى بويىنشا وتكىزىلىپ جاتىر. تالاپكەردىڭ تەست تاپسىرۋ ورنىندا نەگىزگى كامەرادان باسقا تۇلعانى انىقتاۋعا جانە بوگدە ادامداردىڭ كىرۋىنە جول بەرمەۋگە مۇمكىندىك بەرەتىن قوسىمشا فرونتالدى ۆەب-كامەرا ورناتىلعان.
«ءبىرىنشى مۇمكىندىكتە ەرەجە بۇزىلعان جاعدايدا، تەست ناتيجەلەرى جويىلادى جانە تالاپكەرگە ەكىنشى مۇمكىندىك بەرىلمەيدى. ال بىرىنشىسىنەن ءساتتى ءوتىپ، ەكىنشى مۇمكىندىكتە بەلگىلى ءبىر ەرەجەلەردى بۇزسا، ەكەۋىنىڭ دە ناتيجەسى جويىلادى جانە كونكۋرسقا قاتىسا المايدى. سوندىقتان ءاربىر تالاپكەردى اكادەميالىق ادالدىقتى ساقتاۋعا شاقىرامىز»، - دەپ حابارلادى گۇلنار ەرمەكبايەۆا.
ءاربىر اتا-انا ءۇبت-دىڭ ءوتۋ بارىسىن كورە الادى. بارلىق بەينەجازبا تەستىلەۋدەن كەيىن تەكسەرىستەن وتەدى. تەستىلەۋگە قاتىسۋشى ءتارتىپ بۇزعان جاعدايدا ناتيجەسى جويىلادى، گرانت يەگەرى بولىپ جاتسا دا، گرانتىنان ايىرىلادى.