بيىلعى وقۋ جىلىندا الماتى قالاسىندا وقۋشىلاردى تەگىن تاماقپەن قامتاماسىز ەتۋ 40%-عا ارتتى.
ەگەر وتكەن وقۋ جىلىندا تەك 19 مىڭ وقۋشى (نەمەسە وقۋشىلاردىڭ 7%) تەگىن تاماقپەن قامتاماسىز ەتىلسە، بيىل شامامەن 133 مىڭ (45،3%) قامتىلدى. وسىلايشا، بارلىق باستاۋىش سىنىپ وقۋشىسىنىڭ تەگىن تاماقپەن 100% قامتىلۋىن قوسقاندا وقۋشىلاردى تەگىن تاماقپەن قامتۋ 38،3%-عا ءوستى، دەپ حابارلايدى Almaty-akshamy.kz.
ەستەرىڭىزگە سالايىق، قالا اكىمى ەربولات دوسايەۆتىڭ باستاماسىمەن 1-4 سىنىپ وقۋشىلارىن تەگىن تاماقپەن قامتاماسىز ەتۋ بويىنشا العاشقى پيلوتتىق جوبا ەل كولەمىندە العاش رەت بيىلعى وقۋ جىلىنىڭ 1 قىركۇيەگىندە الماتى قالاسىندا باستالدى. بۇعان دەيىن الەۋمەتتىك وسال وتباسىلاردان شىققان ءبىلىم الۋشىلار عانا تەگىن تاماقپەن قامتاماسىز ەتىلەتىن.
«ساپالى ءبىلىم بەرۋدىڭ ماڭىزدى شارتى – وقۋشىلاردى ساپالى ازىقپەن قامتاماسىز ەتۋ. سوندىقتان وتباسىلاردى مەملەكەتتىك قولداۋعا ەرەكشە كوڭىل بولىنەدى. ءبىرىڭعاي ستاندارتتارعا سايكەس، 4 اپتالىق تەگىن تاماقتانۋ ءمازىرى بەكىتىلدى. ول ءبىلىم باسقارماسىنىڭ جانە ءبىلىم بەرۋ ۇيىمدارىنىڭ سايتىندا جازىلعان. ءقازىر بارلىق ءبىلىم بەرۋ ۇيىمىندا تاماقتانۋ ساپاسىنا كۇندەلىكتى مونيتورينگ جۇرگىزەتىن كوميسسيا بار. قۇرامىنا مەديسينا قىزمەتكەرلەرى، مەكتەپ اكىمشىلىگى جانە اتا-انالار قاۋىمىنىڭ وكىلدەرى كىرەدى. تاماقتانۋدى ۇيىمداستىرۋعا ءبىلىم بەرۋ ۇيىمىنىڭ باسشىسى دەربەس جاۋاپتى ەكەنىن اتاپ وتەمىن. ءبىز ءار وقۋشىنىڭ ساپالى تاماقتانۋىن قامتاماسىز ەتۋدى جالعاستىرامىز»، - دەدى الماتى قالاسى ءبىلىم باسقارماسىنىڭ باسشىسى ءلاززات جىلقىبايەۆا.
ايتا كەتەيىك، ءقازىر 1-4 سىنىپ وقۋشىلارى جانە الەۋمەتتىك قورعالماعان جانە از قامتىلعان وتباسىلاردان شىققان 5-11 سىنىپ وقۋشىلارى 100%-ى تەگىن تاماقپەن قامتاماسىز ەتىلگەن.
قالا مەكتەپتەرىندە تاماقتانۋ ساپاسىن ارتتىرۋ ءۇشىن اسحانالار سيفرلاندىرىلادى. بۇل قولما-قول اقشاسىز ەسەپ ايىرىسۋ بويىنشا پيلوتتىق جوبالار، تەگىن تاماقتانۋدى ەلەكتروندىق تابەلدەۋ جانە ت. ب.
بۇل باعىتتاعى جۇمىس جالعاسادى.