الماتىدا “ءقورعاۋ-قاۋىپتى جۇرگىزۋشى” جۇيەسى 17 مىڭنان استام جول قوزعالىسى ەرەجەلەرىن قاساقانا بۇزۋشىنى انىقتادى.
مۇنداي مالىمەتتەردى الماتى قالاسىنىڭ اكىمشىلىك پوليسياسى، “ءقورعاۋ-قاۋىپتى جۇرگىزۋشى” جۇيەسىن ەنگىزۋدىڭ ارالىق تالداۋىن قورىتىندىلاۋ بارىسىندا كەلتىرىپ وتىر، دەپ حابارلايدى Almaty-akshamy.kz Polisia.kz-كە سىلتەمە جاساپ.
«بۇل جاڭاشىلدىق وتكەن جىلدىڭ ءساۋىر ايىندا قولدانىسقا ەنگىزىلدى. پاترۋلدىك پوليسيا قىزمەتكەرلەرىنىڭ پلانشەتتەرىنە ورناتىلعان “ءقورعاۋ-قاۋىپتى جۇرگىزۋشى” باعدارلاماسى ءاپبت جانە ءبىرقاتار مەملەكەتتىك ورگانداردىڭ دەرەكتەر بازاسىمەن بىرىكتىرىلگەن. جالعان مەملەكەتتىك نومىرلەردى پايدالانۋ دەرەكتەرىن، كولىك قۇرالىن باسقارۋ قۇقىعىنان ايىرىلعان جۇرگىزۋشىلەردى، ساقتاندىرۋ ءپوليسى جوقتاردى، تولەنبەگەن ايىپپۇلدار بويىنشا بەرەشەگى بار ادامداردى انىقتاۋعا ەرەكشە نازار اۋدارىلادى»، – دەدى الماتى قالالىق پد اكىمشىلىك پوليسيا باسقارماسىنىڭ باستىعى اسحات قۇلبايەۆ.
“ءقورعاۋ-قاۋىپتى جۇرگىزۋشى” جۇيەسىنىڭ كومەگىمەن 2022 جىلى 14 مىڭ 360 جۇرگىزۋشى، بيىلعى جىلدىڭ باسىنان بەرى 3 مىڭنان استام جۇرگىزۋشى اكىمشىلىك جاۋاپكەرشىلىككە تارتىلدى.
«سونىمەن قاتار بيىلعى جىلى الماتىنىڭ پاترۋلدىك كولىكتەرىنە جول قاۋىپسىزدىگىن قامتاماسىز ەتۋگە جانە جول-كولىك وقيعالارىن ازايتۋعا باعىتتالعان جاڭا “سەرگەك-پاترۋل” كەشەندەرى ورناتىلعانىن ايتا كەتكەن ءجون. جوعارى ينتەللەكتىلى كامەرالاردىڭ كومەگىمەن كەشەن اعىنداعى كولىكتى انىقتاپ، مەملەكەتتىك ءنومىردى تانيدى جانە دەرەكتەردى سەرۆەرگە جىبەرەدى. سونداي-اق متنب “جالعان” ەمەستىگىنە، تەحنيكالىق بايقاۋدىڭ، ساقتاندىرۋ ءپوليسىنىڭ جوقتىعىنا، تولەنبەگەن ايىپپۇلداردىڭ بار-جوعىنا، ۇرلىق جانە قانداي دا ءبىر قۇقىق بۇزۋشىلىققا قاتىسى بار-جوعىنا تەكسەرىلەدى»، – دەدى اسحات قۇلبايەۆ.