ناۋقانعا قالاداعى 11 مەكتەپتەن 40-قا جۋىق وقۋشى قاتىستى
ەلىمىزدە جىل سايىن 4،5 ملن توننا تۇرمىستىق قالدىق شىعارىلادى. سونىڭ شامامەن نەبارى 25 پايىزى عانا قايتا وڭدەلەدى دەسەك، قالعانى قوقىس پوليگوندارىنىڭ اۋماعىن كەڭەيتىپ وتىر. سەبەبى سۇرىپتاۋ كاسىپورىندارى بارلىق ايماقتا جوق. بۇل جايىندا ەكولوگيا جانە تابيعي رەسۋرستار مينيسترلىگى مالىمدەدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
2030 جىلعا دەيىن قايتا وڭدەلەتىن قالدىقتاردىڭ ۇلەسىن 40 پايىزعا جەتكىزۋ مىندەتى تۇر. ال الماتى تۇرعىندارى 1 جىل ىشىندە 460 مىڭ تونناعا جۋىق قوقىس تاستايدى ەكەن. ولاردى سۇرىپتايتىن الاتاۋ اۋدانىنداعى ەڭ ۇلكەن زاۋىت تاۋلىگىنە قانشا توننا قالدىقتى قايتا وڭدەۋگە قاۋقارلى؟
جىلىنا 550 مىڭ توننا قوقىستى سۇرىپتاپ، وڭدەۋگە قۋاتى جەتەتىن زاۋىت تاۋلىگىنە 1200 توننا تۇرمىستىق قالدىق قابىلدايدى. مەكەمە الاتاۋ اۋدانىندا ورنالاسقان. 200-دەن اسا قىزمەتكەر جۇمىس ىستەيتىن زاۋىت قالا قوقىسىنىڭ 75 پايىزىن قامتيدى. ول ۇلكەن 3 بولىكتەن تۇرادى. ءبىرىنشىسى - قابىلداۋ ءبولىمى، وندا كەرەكسىز زاتتار جينالادى. ءارى قاراي قوقىس سۇرىپتالىپ، سىعىمدالۋ ءۇشىن ەكىنشى بولىككە تۇسەدى. سوڭعىسى – قويما. ال وڭدەۋگە جارامايتىن ازىق-تۇلىك، قۇرىلىس ماتەريالدارى، اعاش بۇتاقتارى مەن تەحنيكا سياقتى قالدىقتار بولەك شىعارىلىپ تاستالادى.
وقۋ جىلى باستالعالى الماتىلىق وقۋشىلار ءدال وسى زاۋىتقا 1،5 مىڭ توننا قالدىقتى قايتا وڭدەۋگە تاپسىرعان. ءىس-شارا قالا اكىمدىگى مۇرىندىق بولعان «جاسىل مەكتەپ» اكسياسى اياسىندا جۇزەگە استى. اتالمىش جوبا ءبىلىم وشاقتارىنىڭ ىشىندە ەكو-بەلسەندىلەر توبىن قۇرۋعا باعىتتالعان. ۇيىمداستىرۋشىلار سول ارقىلى مەكتەپتەر ەكو-حابقا اينالۋى مۇمكىن دەيدى.
– ماقساتىمىز – وسكەلەڭ ۇرپاققا ەكولوگيالىق ءومىر سالتىن ءتۇسىندىرۋ، الەۋمەتتى اعارتۋ جۇمىستارىمەن اينالىسۋ. قاراپايىم قاداممەن قورشاعان ورتانى قالاي قورعاۋعا بولاتىنىن ءتۇسىندىرىپ، دارىستەر وتكىزدىك، – دەدى جوبا ۇيىمداستىرۋشىسى ەراسىل ءاشىمباي
«جاسىل مەكتەپ» جوباسى بىلتىر باستاۋ العان. بيىل بۇل ناۋقانعا قالاداعى 11 مەكتەپتەن 40-قا جۋىق وقۋشى قاتىسىپ، بەلسەندىلىگى ءۇشىن كوزگە ءتۇسىپ تە ۇلگەردى. ولار وقۋ جىلى بارىسىندا ءوزارا ەكو-فەستيۆالدەر وتكىزىپ، تاقىرىپ اياسىندا يۋتۋب-ارنالارىن قۇردى.
– ءبىز مەكتەپتە ءتۇرلى ەكوبوكستار وتكىزدىك. سول ارقىلى ءبىلىم الىپ، ەكولوگيالىق مادەنيەتىمىزدى دامىتتىق، – دەدى وقۋشى كاميلا ءومىرزاق
جوبا كەلەسى وقۋ جىلىنان باستاپ اۋقىمىن كەڭەيتپەك. الماتىلىق ءبىلىم وشاقتارىنىڭ 100 پايىزىن قامتۋ – جوبا ۇيىمداستىرۋشىلارىنىڭ ماقساتى. تابيعات جاناشىرلارىنىڭ ايتۋىنشا، ەكولوگيالىق مادەنيەتتى قالىپتاستىرۋ مەكتەپتەن باستالادى.