تالعار اۋدانىندا اليمەنت تولەۋدەن جالتارىپ جۇرگەن 26 بورىشكەر اكىمشىلىك جاۋاپكەرشىلىككە تارتىلعان
«اليمەنت - قارىز ەمەس، پارىز». وسى ۇستانىمدى ۇران ەتكەن الماتى وبلىسى تالعار اۋدانىنىڭ جەكە سوت ورىنداۋشىلارى پەرزەنتى الدىندا قارىزى بار جۇمىسسىز اكەلەردىڭ ەكى قولعا ءبىر كۇرەك تابۋىنا سەپتەستى. ولار بوس جۇمىس ورىندار جارمەڭكەسىن ارنايى 1 ماۋسىم – بالالار كۇنىنە وراي ۇيىمداستىرىپ وتىر، دەپ حابارلايدى Almaty-akshamy.kz Almaty.tv-گە سىلتەمە جاساپ.
41 جاستاعى رومان ساشكوۆ – الماتى وبلىسىنىڭ تۇرعىنى. جۇبايىمەن اجىراسقانىنا 10 جىل بولىپتى. كامەلەتكە تولماعان ءبىر قىزى بار. ءوزى جەكە كاسىپكەر. الايدا اليمەنتتى 4 جىل بويى دۇرىس تولەي الماي، قارىزى 1 ميلليون 700 مىڭ تەڭگەگە جۋىقتاپ قالىپتى. ەندى ەكى قولعا ءبىر كۇرەك تابۋ ءۇشىن وسى جارمەڭكەگە كەلىپ، وزىنە قاجەت جۇمىستى تاپقانىن ايتادى.
– ءاربىر اكە بالاسى ءۇشىن جاۋاپتى. سوندىقتان پەرزەنتىنىڭ جاعدايىن جاساپ، اليمەنتتى تولەۋى قاجەت. مەن دە بۇل جاۋاپكەرشىلىكتەن قاشپايمىن. سوندىقتان وسى جارمەڭكەگە كەلىپ وتىرمىن. مۇندا ءتۇرلى جۇمىس ۇسىنىلدى. ۇناعانى – جۇك كولىگىنىڭ جۇرگىزۋشىسى. ەندى تاجىريبەدەن ءوتىپ كورەمىن، – دەدى بورىشكەر رومان ساشكوۆ.
الماتى وبلىسىنا قاراستى تالعار اۋدانىندا جىل باسىنان بەرى اليمەنت تولەۋدەن جالتارىپ جۇرگەن 26 بورىشكەر اكىمشىلىك جاۋاپكەرشىلىككە تارتىلعان. 10-نان استام ءىس قىلمىستىق جازاعا تارتۋعا، 5 ءىس سوتقا جولدانعان. ءتورت ازاماتقا ۇكىم شىعىپتى. قالعاندارىنا قاتىستى تەرگەۋ امالدارى جالعاسىپ جاتىر.
– تالعار اۋدانىندا 3 مىڭنان استام اليمەنت ءوندىرۋ تۋرالى اتقارۋشى ءىس قوزعالعان. ول اتقارۋشى ىستەردىڭ اراسىندا بورىشكەرلەردىڭ قارىزى 394 ميلليون تەڭگەدەن اسادى. وسى جىلدىڭ 1 قاڭتارىنان باستاپ جەكە سوت ورىنداۋشىلارىمەن 75 ميلليوننان استام قارىز ءوندىرىلدى، – دەدى وبلىستىق اتقارۋشىلىق وكرۋگىنىڭ جەكە سوت ورىنداۋشىسى الىبەك راحمەتوۆ.
«پەرزەنتى الدىنداعى قارىزىن وتەۋدەن جالتارىپ جۇرگەندەر اراسىندا 10-عا جۋىق كوكەك انا بار»، - دەيدى جەكە سوت ورىنداۋشىلارى. ءقازىر ولاردىڭ دا ءىسى قارالىپ جاتىر. ايتا كەتەيىك، اۋداندا جىل باسىنان بەرى 32 بورىشكەر جۇمىسسىزدار ەسەبىندە تۇر. ال بۇگىن بوس ورىندار جارمەڭكەسىنە كەلگەن 15 ازاماتتىڭ جەتەۋى ەكى قولعا ءبىر كۇرەك تاپتى. ولارعا كولىك جۇرگىزۋشى، جۇك تاسۋشى، دانەكەرلەۋشى، قويما قىزمەتكەرى سەكىلدى جانە ماماندىعى بويىنشا ءبىرقاتار جۇمىس ۇسىنىلدى.