جىل سايىن الماتىلىق مەكتەپ وقۋشىلارىنىڭ سانى ورتاشا ەسەپپەن 12-14 مىڭعا دەيىن كوبەيىپ كەلەدى
بۇل كورسەتكىش دەموگرافيا مەن ىشكى ميگراسيا ەسەبىنەن ءوسىپ وتىر. مەكتەپتەردىڭ قۇرىلىسى جايلى اقپاراتپەن وڭىرلىك كوممۋنيكاسيالار قىزمەتىنىڭ بريفينگىندە الماتى قالاسى اكىمىنىڭ ورىنباسارى اسەم ءنۇسىپوۆا ءبولىستى، دەپ حابارلايدى اlmaty-akshamy.kz.
الماتىدا بارلىعى 320 453 وقۋشى وقيتىن 310 مەكتەپ بار (292 099 وقۋشىسى بار 212 مەملەكەتتىك مەكتەپ جانە 28 354 وقۋشىسى بار 98 جەكەمەنشىك مەكتەپ). سوعان قاراماستان، وقۋشى ورىندارىنىڭ تاپشىلىعى ماسەلەسى ساقتالۋدا، ول بۇگىنگى كۇنى 19 120 ورىندى قۇرايدى.
2022 جىلى مەكتەپتەردە وقۋشىلار ورنىنىڭ تاپشىلىعىن ازايتۋ ءۇشىن مىنالار ەنگىزىلدى:
- 8100 ورىندى قامتيتىن 5 مەملەكەتتىك مەكتەپ؛
انىقتاما ءۇشىن: (1800 ورىن "قالقامان" ىقشاماۋدانىنداعى №206، 1800 ورىن "سايالى" شاعىناۋدانىنداعى №204، 1500 ورىن "توميريس" شاعىناۋدانىنداعى №205، 1500 ورىن "قالقامان" شاعىناۋدانىنداعى №208، 1500 ورىن «نۇركەنت» شاعىن اۋدانىنداعى №209)؛
- «مادەنيەت» شاعىناۋدانىندا ءۇش اۋىسىمداعى №196 مەكتەپتىڭ ورنىنا 1500 ورىندى قامتيتىن جاڭا مەكتەپ سالىندى؛
- 2393 ورىندى قامتيتىن 6 جەكەمەنشىك مەكتەپ؛
انىقتاما ءۇشىن: (بوستاندىق اۋدانىندا – 599 ورىندىق "زامان" مەكتەبى، 384 ورىندىق «JOO High School Almaty» مەكتەبى، 540 ورىندىق "Almaty School of Physics and Mathematics" مەكتەبى، تۇركسىب اۋدانىندا – 420 ورىندىق «Millennium» مەكتەبى، ناۋرىزباي اۋدانىندا – 200 ورىندىق AiDi Education مەكتەبى، 250 ورىندىق «Zhiger S» مەكتەبى)؛
- 900 ورىندىق قولدانىستاعى ءۇش مەكتەپتى كەڭەيتۋ (300 ورىندىق №191، 300 ورىندىق 146، 300 ورىندىق 125)؛
- 600 ورىندىق ءبىر عيمارات ساتىپ الۋ («ادىلەت» كوللەدجى، گاگارين كوشەسى، 135ا).
وسىلايشا، 13 493 وقۋشى ورنىنا ارنالعان 16 نىسان ەنگىزىلدى.
سونىمەن قاتار، جەلتوقسان ايىنىڭ سوڭىندا «دارحان» شاعىناۋدانىندا 1500 ورىندىق №210 جانە «الما سيتي» شاعىناۋدانىنداعى 1200 ورىندىق №207 جاڭا مەكتەپ پايدالانۋعا بەرىلەدى.
ورىن تاپشىلىعى ماسەلەسىن شەشۋ ءۇشىن مەملەكەت باسشىسى «جايلى مەكتەپ» ۇلتتىق جوباسىن جۇزەگە اسىرۋ جانە 2030 جىلعا قاراي ءبىر اۋىسىمدىق وقىتۋعا كوشۋ جونىندە تاپسىرمالار بەردى.
«ۇلتتىق جوبا اياسىندا 2023 جىلدان باستاپ رەسپۋبليكالىق بيۋدجەت ەسەبىنەن 37 100 ورىندى قامتيتىن 22 مەكتەپتىڭ قۇرىلىسىن باستاۋ جوسپارلانۋدا. بۇل رەتتە جەرگىلىكتى بيۋدجەت ەسەبىنەن جالپى سوماسى 11 ملرد. تەڭگەگە جەر تەلىمدەرىن ساتىپ الۋ جانە ولاردى ينفراقۇرىلىمعا قوسۋ ماسەلەلەرى شەشىلەتىن بولادى»، - دەدى ءا.ءنۇسىپوۆا.
سونىمەن قاتار، اكىمدىك «1000 مەكتەپ» جوباسىن جۇزەگە اسىرۋدى جالعاستىرادى، ونىڭ اياسىندا 2023-2025 جىلدار ارالىعىندا 19 905 ورىنعا ارنالعان 36 ءبىلىم بەرۋ نىسانى (3 مەملەكەتتىك مەكتەپ، 7 قوسىمشا قۇرىلىس، 19 جەكەمەنشىك مەكتەپ) پايدالانۋعا بەرىلەدى. وسىلايشا، 2026 جىلعا قاراي وقۋشىلار ورىندارىنىڭ تاپشىلىعى تابيعي دەڭگەيگە دەيىن قىسقارادى (2000 – 3500 ورىن).