قازاقستان رەسپۋبليكاسىنىڭ حالىق ءارتىسى روزا باعلانوۆانىڭ 100 جىلدىق مەرەيتويىن مەرەكەلەۋ اياسىندا الماتى قالاسىنىڭ اكىمى ەربولات دوسايەۆتىڭ، قازاقستاننىڭ ەڭبەك ەرى، تەاتر جانە كينو اكتەرى ءاسانالى ءاشىموۆتىڭ، قازاقستاننىڭ ەڭبەك ەرى الىبەك دىنىشيەۆتىڭ، قازاقستاننىڭ حالىق ءارتىسى التىنبەك قورازبايەۆتىڭ، مادەنيەت قايراتكەرى قۋانىش ءابدىقالىموۆتىڭ، فيلولوگ ءارى اقىن اققۇشتاپ باقتىگەرەيەۆانىڭ، ءانشىنىڭ تۋعاندارى مەن جاقىندارى – ۇلى تاجەن مەن كەلىنى مارال باعلانوۆتاردىڭ قاتىسۋىمەن ايگىلى ءانشى ەسكەرتكىشىنىڭ سالتاناتتى اشىلۋ ءراسىمى ءوتتى، دەپ حابارلايدى Almaty-akshamy.kz
مەدەۋ اۋدانىنداعى جامبىل اتىنداعى قازاق مەملەكەتتىك فيلارمونياسى عيماراتىنىڭ الدىنا بيىكتىگى 4،8 مەتر قولا ەسكەرتكىش ورناتىلدى، فيلارمونيا قابىرعاسىندا 1949-1960 جىلدار ارالىعىندا روزا باعلانوۆا ونەر كورسەتكەن ەدى. قولا جانە گرانيتتەن جاسالعان ەسكەرتكىشتىڭ اۆتورلارى – مۇسىنشىلەر د.اعزاموۆ، ۋ.اقجولتاي، ا.جامحان، ا.قابىل.
ەسكەرتكىشتى اشۋ ءراسىمى بارىسىندا الماتى قالاسىنىڭ اكىمى ەربولات دوسايەۆ روزا باعلانوۆانىڭ قازاق حالىق مۋزىكاسى مەن قازاقستان كومپوزيتورلارىنىڭ شىعارماشىلىعىن دامىتۋعا جانە ناسيحاتتاۋعا قوسقان باعا جەتپەس زور ۇلەسىن اتاپ ءوتتى.
«ءبىزدىڭ ۇلى ءانشىمىز روزا باعلانوۆاعا ەسكەرتكىش ورناتۋ – ونىڭ مۇراسىن قۇرمەتتەۋ جانە ەستە ساقتاۋ. ول مۋزىكا ونەرىنىڭ شىرقاۋ بيىگىندەگى جارىق جۇلدىز بولدى. ونىڭ ەرەكشە داۋىسى مەن تالانتى ءبىزدىڭ حالقىمىزدىڭ باعا جەتپەس قۇندىلىعىنا اينالدى. ءانشىنىڭ سۇيىكتى قالاسى – الماتىدا 100 جىلدىق مەرەيتوي اياسىندا روزا باعلانوۆانىڭ ەسىمىن ماڭگى ەستە قالدىرۋ ءۇشىن ەسكەرتكىش ورناتقانىمىزعا شەكسىز قۋانىشتىمىن»، – دەدى ەربولات دوسايەۆ.
قالا باسشىسى سۇلۋلىق پەن بيىك ونەردىڭ سيمۆولىنا اينالعان روزا باعلانوۆانىڭ مادەنيەت پەن ونەردىڭ قارا شاڭىراعى – الماتى قالاسىندا ەسكەرتكىش-بەينەسىنىڭ تۇرۋى قاي جاعىنان دا تاريحي ادىلەتتىلىك ەكەنىن ايتتى.
«وسىناۋ ەڭسەلى ەسكەرتكىشتىڭ اۆتورلارى – ەشكەنوۆ عازيز، جامحان ايدار جانە اقجولتاي ۇلاعات ورتامىزدا. ورايلى ءساتتى پايدالانا وتىرىپ، عاجايىپ ءمۇسىندى سومداپ شىققان ونەر يەلەرىنە العىس ايتقىم كەلەدى. بارشا قالا تۇرعىندارىن، زيالى قاۋىمدى، جينالعان جۇرتشىلىقتى بۇگىنگى ەڭسەلى ەسكەرتكىشتىڭ اشىلۋىمەن شىن جۇرەكتەن قۇتتىقتايمىن»! - دەدى ەربولات دوسايەۆ.
بۇگىن الماتىدا روزا باعلانوۆانىڭ 100 جىلدىعىنا وراي رەسپۋبليكا سارايىندا «اقماڭدايلىم» اتتى مەرەكەلىك كونسەرت ءوتتى. اتى اڭىزعا اينالعان ءانشىنىڭ رەپەرتۋارىنداعى اندەردى تانىمال قازاقستاندىق ارتىستەر ورىندادى.
