بۇل تۋرالى ءماسليحات سەسسياسىندا الماتى قالاسىنىڭ 2023-2025 جىلدارعا ارنالعان بيۋدجەت جوباسىن قاراۋ بارىسىندا ەربولات دوسايەۆتى مالىمدەدى، دەپ حابارلايدى Almaty-akshamy.kz.
مەملەكەت باسشىسىنىڭ الماتى ەكونوميكاسىن ءارتاراپتاندىرۋ جونىندەگى تاپسىرمالارىن ەسكەرە وتىرىپ، نەگىزگى ەكپىن وڭدەۋ ونەركاسىبىن، ءتۋريزمدى، IT-سەكتوردى جانە كرەاتيۆتى يندۋستريالاردى دامىتۋعا باعىتتالاتىن بولادى.
الماتى يندۋستريالىق ايماعىنىڭ II كەزەڭىن دامىتۋ ءۇشىن اۋماقتى 189 گەكتارعا كەڭەيتۋ جوسپارلانعان. بۇل ۇسىنىستى مەملەكەت باسشىسى ماقۇلدادى. قازىرگى ۋاقىتتا ينجەنەرلىك ينفراقۇرىلىم بويىنشا جوبالاۋ-سمەتالىق قۇجاتتاما ازىرلەنىپ جاتىر. كوكتەمگى ناقتىلاۋ كەزىندە جوبانى رەسپۋبليكالىق بيۋدجەتتەن قارجىلاندىرۋ ءۇشىن 2023-2024 جىلدارعا 40 ملرد. تەڭگە سوماسىنا بيۋدجەتتىك ءوتىنىم بەرۋ جوسپارلانعان.
قالادا شاعىن جانە ورتا يندۋستريالىق كاسىپكەرلەرگە ارنالعان ونەركاسىپتىك پاركتەر بەلسەندى دامىپ كەلەدى. قازىرگى تاڭدا 8 ونەركاسىپتىك پارك سالىندى (ينۆەستيسيا سوماسى 2،2 ملرد. تەڭگە)، تاعى 11 ونەركاسىپتىك پارك سالىنىپ جاتىر، ونىڭ ىشىندە 2023 جىلى 3،5 ملرد. تەڭگە سوماسىنا 7 ونەركاسىپتىك پاركتى ىسكە قوسۋ جوسپارلانعان.
كرەاتيۆتى يندۋستريالاردى دامىتۋ ءۇشىن 10 ملرد. تەڭگە سوماسىنا كرەاتيۆتى يندۋستريالاردىڭ ۆەنچۋرلىك قورىن قۇرۋ كوزدەلگەن، ونىڭ ىشىندە 5 ملرد. تەڭگە - جەكە ينۆەستيسيالار ەسەبىنەن.
قالا ەكونوميكاسىنىڭ درايۆەرى رەتىندە ءتۋريزمدى دامىتۋ ماقساتىندا مەملەكەت باسشىسىنىڭ تاپسىرماسىن ورىنداۋ ءۇشىن الماتى وبلىسىنىڭ اكىمدىگىمەن بىرلەسىپ، جەكە ينۆەستورلاردى تارتا وتىرىپ، تۋرگەننەن قاسكەلەڭگە دەيىن الماتى تاۋ كلاستەرىن دامىتۋ شارالارى قابىلداناتىن بولادى.
جالپى، 2023 جىلعا رەسپۋبليكالىق جانە وڭىرلىك باعدارلامالار شەڭبەرىندە باسىم باعىتتارداعى (وڭدەۋشى ونەركاسىپ، كرەاتيۆتى ەكونوميكا، IT) 2،6 مىڭعا جۋىق جوبانى قارجىلاندىرۋ ءۇشىن بيۋدجەتتەن 40 ملرد. تەڭگەدەن استام قاراجات ءبولۋ جوسپارلانعان (جەرگىلىكتى بيۋدجەت – 10،6 ملرد.، رەسپۋبليكالىق بيۋدجەت – 29،4 ملرد.). بۇل شارالار ەكونوميكانىڭ ورتاشا جىلدىق ءوسىمىن 5،0% دەڭگەيىندە قامتاماسىز ەتۋگە باعىتتالاتىن بولادى.