جىگىت جەلىگە جۇكتەۋ ءۇشىن قىزىقتى ۆيدەو تۇسىرمەك بولعان
الماتىدا Lexus كولىگىنىڭ جولاۋشىسى تەرەزەدەن بەلىنە دەيىن شىعىپ الىپ، قاتار كەلە جاتقان كولىكتى تەلەفونىنا تۇسىرگەن. جول قوزعالىسى ەرەجەلەرىن ورەسكەل بۇزۋ فاكتىسى تىركەلگەن ۆيدەوعا قاتىستى پوليسيا تۇسىنىكتەمە بەردى، دەپ حابارلايدى Almaty-akshamy.kz.
بولجام بويىنشا، جىگىت جەلىگە جۇكتەۋ ءۇشىن قىزىقتى ۆيدەو تۇسىرمەك نيەتتە ءوز ءومىرىن قاتەرگە تىككەن. ول تەرەزەدەن بەلۋارىنا دەيىن شىعىپ، قاتار كەلە جاتقان كولىكتى تەلەفونىنا تۇسىرگەن.
الماتى قالالىق پوليسياسى قۇقىق بۇزۋشى ازاماتقا قاتىستى ق ر اقبك-نىڭ 593-بابى 1-بولىگى جانە ق ر اقبك-نىڭ 593-بابى 2-بولىگى بويىنشا اكىمشىلىك حاتتامالار تولتىرىلعانىن جەتكىزدى.
جۇرگىزۋشى ءوز كىناسىن تولىقتاي مويىنداعان.
"سونىمەن قاتار، ونىمەن الداعى ۋاقىتتا جول قوزعالىسى ەرەجەلەرىن بۇزۋدىڭ الدىن الۋ جونىندە زاڭگەرلىك ءتۇسىندىرۋ جۇمىستارى جۇرگىزىلدى"،- دەلىنگەن حابارلامادا.