توپىراقتان زارداپ شەككەن ەكى وتباسى دا ءقازىر جاماۋ-جاماۋ ءۇيدىڭ بۇرىشىندا كۇنەلتىپ جاتىر
الماتى وبلىسىندا 190 جەر تەلىمى قۇلاۋى مۇمكىن. ولاردى «قازسەلدەنقورعاۋ» قىزمەتكەرلەرى ءقاۋىپتى ايماقتاردىڭ تىزىمىنە ەنگىزىپ، دابىل قاعىپ جاتىر، دەپ حابارلايدى Almaty-akshamy.kz Almaty.tv-گە سىلتەمە جاساپ.
اقپاننىڭ اياعىندا اياقاستى جار قۇلاپ، توپىراق باسىپ قالعان بەساعاشتاعى ەكى ءۇيدىڭ جاعدايى ءالى رەتكە كەلمەگەن. سەبەبى قاباقتى تەگىستەۋى كەرەك بولعان مەردىگەرلەردىڭ بيىككە شىعۋعا باتىلى بارماعان.
«تەندەردىڭ ناتيجەسى شىقتى، ۇتقان مەردىگەر كومپانيا جۇمىس ىستەمەيدى. ول ىستەمەگەن سوڭ، زاڭ تاراپىنا ەكىنشى رەت بەرۋىمىز كەرەك. ودان كەيىن تۇرعان 12 ادام قاتىستى تەندەرگە. جەردى 2006-2007 دە جەر قىلدىرىپ شىعارىپ ساتقان. جاۋاپكەرشىلىك ءبىرىنشى كەزەكتە ءۇي سالعىزىپ رۇقسات بەرگەن گاسك دەگەن كومپانيا بار، ارحيتەكتۋرا بار»، – دەدى بەساعاش اۋىلدىق وكرۋگىنىڭ اكىمى ەرنار ءجۇنىسوۆ.
ال جۇمىسىمدى باستاعالى ءبىر جىل عانا بولعان بەساعاش اكىمى اپاتتى جەر تەلىمدەرى بۇرىن ساتىلعانىن العا تارتتى. ال بۇدان بىلاي تاۋلى ايماقتا جەر تەلىمىن بەرۋگە رۇقسات بەرىلمەيدى.
«اۋەلى قۇلاعان توپىراقتى رەتتەسە، سودان كەيىن ءۇيدى جوندەپ بەرەتىنىن ايتتى. ۇيگە قالاي كىرەمىز، بىلمەيمىن؟» – دەدى زارداپ شەگۋشى باقىت ورىنتاي قىزى.
ال توپىراق وپىرىلعان ايماقتا تاعى 18 ۇيگە دە ءقاۋىپ بارىن ماماندار اشىق ايتىپ وتىر. ويتكەنى كەي تۇرعىندار جەر ۋچاسكەلىرىن كەڭەيتۋ ماقساتىندا جىرالاردى جاساندى توپىراقپەن تولتىرىپ، ءۇي سالعان كورىنەدى.
«تاۋلى ايماق بولعان سوڭ جاڭبىر كوپ جاۋادى. سول كەزدە ءقاۋىپ تە كۇشەيەدى. ارينە جاۋاپكەرشىلىك بولۋى كەرەك. ءبىراق كوپ ادام بۇنداي ءقاۋىپتىڭ بارىن بىلمەيدى. وسى جەردى ساتىپ العاندا ەسكەرتىپ، ەشكىم دە تۇسىندىرمەدى»، – دەدى بەساعاش اۋىلىنىڭ تۇرعىنى بايانسۇلۋ قارامانوۆا.
«تالعار اۋدانىنا كەلەتىن بولساق 43 وپىرىلۋ ءقاۋىپى بار ۋچاستوك بار. سونىڭ بىرەۋى – بۋراباي شاعىناۋدانىنداعى باياناۋىل كوشەسى. 2018 جىلى كولساي كولدەرىندە، 2017 جىلى تالعار قالاسىنىڭ تۇيەتاۋ ايماعىندا اپاتى جاعداي ورىن العان»، – دەدى «قازسەلدەنقورعاۋ» مم تالعار وندىرىستىك پايدالانۋ ءبولىمىنىڭ باسشىسى ماحامەدين بەدەلبەكوۆ.
توپىراقتان زارداپ شەككەن ەكى وتباسى دا ءقازىر جاماۋ-جاماۋ ءۇيدىڭ ءبىر بۇرىشىندا كۇنەلتىپ جاتىر. كەيبىرى ۋاقىتشا پاتەر جالداپ قالاعا كەتىپتى. ال اپاتتى ايماقتا الدىن-الۋ جۇمىسىن جۇرگىزىپ جاتقان جۇمىسشىلار بۇگىن-ەرتەڭ بىتپەيتىنىن اشىپ ايتتى.