نۇرتاس وڭداسىنوۆتىڭ عىلىم مەن مادەنيەتتىڭ دامۋىنا زور ەڭبەك سىڭىرگەن قايراتكەر.
قازاقستان تاۋەلسىزدىگىنىڭ 30 جىلدىعى اياسىندا الماتى قالاسىندا قوعام جانە عىلىم قايراتكەرىن ماڭگى ەستە قالدىرۋعا ارنالعان ءىس-شارا ءوتتى، دەپ حابارلايدى Almaty-akshamy.kz
ەسكەرتكىشتىڭ اشىلۋ سالتاناتىنا قاتىسقان الماتى اكىمى باقىتجان ساعىنتايەۆ جينالعاندارعا ارناعان سوزىندە نۇرتاس وڭداسىنوۆتىڭ قازاقستاندىق عىلىم مەن مادەنيەتتىڭ بولاشاعىن قالىپتاستىرۋعا سىڭىرگەن ەڭبەگىن اتاپ ءوتتى. قيىن جىلدارعا قاراماستان، ول ەل ەكونوميكاسىن دامىتۋ ءۇشىن قولدان كەلگەننىڭ ءبارىن جاسادى.
نۇرتاس وڭداسىنوۆ 1904 جىلى 26 قازاندا تۋعان. 1938-1951 جىلدارى – قازاق كسر مينيسترلەر كەڭەسىنىڭ حكك ءتوراعاسى، 1954-1955 جىلدارى – قازكسر جوعارعى كەڭەسى پرەزيديۋمىنىڭ ءتوراعاسى، سودان كەيىن گۋريەۆ (اتىراۋ) وبلىسى وبلىستىق اتقارۋ كوميتەتىنىڭ ءتوراعاسى، وبلىستىق پارتيا ۇيىمىنىڭ باسشىسى.
نۇرتاس وڭداسىنوۆ قازاقستاندا دەربەس عىلىم اكادەمياسىنىڭ قۇرىلۋىنا ىقپال ەتتى. ونىڭ جانىنان ايەلدەر پەداگوگيكالىق ينستيتۋتى، ۇلتتىق كونسەرۆاتوريا، دەنەشىنىقتىرۋ ينستيتۋتى، پوليتەحنيكالىق جانە تەحنولوگيالىق ينستيتۋتتار اشىلىپ، مەديسينالىق، شەت تىلدەرى ينستيتۋتتارىنىڭ فاكۋلتەتتەرى كەڭەيتىلدى.
ونىڭ باسشىلىعىمەن ەرتىس – قاراعاندى، ارىس – تۇركىستان، ءمىرزاشول كانالدارى، اتىراۋ، تەمىرتاۋ، جەزقازعان، بالقاش، اقتوبە زاۋىتتارى، سونداي-اق مويىنتى – شۋ تەمىر جولى سالىندى.
نۇرتاس وڭداسىنوۆ اراب، پارسى تىلدەرىن جاقسى ءبىلدى. 1962 جىلى زەينەتكە شىققاننان كەيىن شىعارماشىلىق جانە عىلىمي قىزمەتپەن اينالىستى. 1969 جىلى «ارابشا-قازاقشا تۇسىندىرمە سوزدىگى»، 1974 جىلى «پارسىشا-قازاقشا تۇسىندىرمە سوزدىگى» جارىق كوردى.
بيۋست ۇلتتىق عىلىم اكادەمياسى عيماراتىنىڭ جانىنا ورناتىلدى، كەزىندە ونى قۇرۋعا نۇرتاس وڭداسىنوۆ قاتىسقان بولاتىن. ەسكەرتكىشتىڭ اشىلۋ سالتاناتىنا قازاقستان جازۋشىلار وداعىنىڭ ءتوراعاسى ۇلىقبەك ەسداۋلەت، جازۋشى دۋلات يسابەكوۆ جانە باسقا دا زيالى قاۋىم وكىلدەرى قاتىستى.