وتىرىس بارىسىندا وزەكتى ماسەلەلەر قارالدى، ولاردى شەشۋ ءۇشىن باقىتجان ساعىنتايەۆ قالا اكىمىنىڭ ورىنباسارلارى مەن اۋدان اكىمدەرىنە ءبىرقاتار تاپسىرمالار بەردى.
پارتيانىڭ الماتى قالالىق فيليالىنىڭ ءتوراعاسى، قالا اكىمى باقىتجان ساعىنتايەۆ Nur Otan پارتياسىنىڭ جول كارتاسىن ىسكە اسىرۋ ماسەلەلەرى بويىنشا ساياسي كەڭەس بيۋروسىنىڭ كەڭەيتىلگەن وتىرىسىن وتكىزدى، دەپ حابارلايدى Almaty-akshamy.kz
Nur Otan پارتياسىنىڭ الماتى قالاسىنداعى «وزگەرىستەر جولى: اركىمگە لايىقتى ءومىر» اتتى سايلاۋالدى باعدارلاماسىن ىسكە اسىرۋ جونىندەگى جول كارتاسى اياسىندا الەۋمەتتىك، ينجەنەرلىك جانە اۆتوموبيل كولىگى ينفراقۇرىلىمى بويىنشا ءبىرقاتار جوبالار ىسكە اسۋدا. مىسالى، ءبىلىم بەرۋ، دەنساۋلىق ساقتاۋ، مادەنيەت، سپورت، كرەاتيۆتى يندۋستريالار مەن الەۋمەتتىك دامۋ سالالارىندا 65 تارماق ورىندالۋدا.
جۇرگىزىلگەن جۇمىس اياسىندا ءقازىردىڭ وزىندە 72 جەكەمەنشىك بالاباقشا اشىلدى (جوسپار بويىنشا - 65 بالاباقشا)، 3 920 ستۋدەنتتەر تجكب بويىنشا دۋالدى وقۋمەن قامتىلدى، №186، 187 مەكتەپتەر اۋماعىنداعى بالاباقشالاردىڭ جانە توعىز مەكتەپتەردىڭ جانىنداعى (№6، 121، 133، 170، 199، 144، 38، 166، 60) قوسىمشا كورپۋستاردىڭ قۇرىلىستارى، سونداي-اق 4 مەكتەپتەردە (№40، 81، 54، 45) سەيسميكالىق نىعايتۋ جانە جوندەۋ جۇمىستارى اياقتالدى.
سونىمەن قاتار، №42 جانە №181 مەكتەپتەردەگى دەنە شىنىقتىرۋ-سپورت ايماقتارى جاڭارتىلدى. قالانىڭ اۋلالارى، ساياباقتارى مەن الاڭدارىنا 97 «Workout» سپورت قۇرىلعىلارى ورناتىلدى. جالپى، بالالاردىڭ سپورتپەن 1 267 سەكسيادا تەگىن اينالىسۋلارىنىڭ مۇمكىندىكتەرى كەڭەيتىلدى.
سونىمەن قاتار، مەديسينالىق مەكەمەلەر ءۇشىن جاڭا نىساندار،ونىڭ ىشىندە وتباسىلىق-دارىگەرلىك امبۋلاتوريالار سالۋ جوبالارىن ىسكە اسىرۋدىڭ بارىسى قارالدى. بۇگىندە №6 ەمحانا مەن اۋدانارالىق تۋبەركۋلەزگە قارسى ديسپانسەردى سەيسميكالىق نىعايتۋ جانە جوندەۋ جۇمىستارى اياقتالدى.
جول ينفراقۇرىلىمىن جاقسارتۋ بويىنشا جۇمىستار جالعاسۋدا، مىسالى ناۋرىزباي اۋدانىندا الاتاۋ كوشەسىنىڭ سابدەنوۆ كوشەسىنەن رايىمبەك داڭعىلىنا دەيىنگى 2 شاقىرىمدىق ۋچاسكەسى اشىلدى. ءتورت جولاقتى جول ناۋرىزباي اۋدانىنىڭ اكىمشىلىك ورتالىعىن قالانىڭ نەگىزگى ماگيسترالىمەن بايلانىستىردى. جىل سوڭىنا دەيىن مەترونىڭ ەكى بەكەتىنىڭ تەحنيكالىق ىسكە قوسىلۋى جوسپارلانۋدا.
كەڭەستى قورىتىندىلاعان Nur Otan پارتياسى الماتى قالالىق فيليالىنىڭ ءتوراعاسى، الماتى اكىمى باقىتجان ساعىنتايەۆ قالالىقتاردىڭ ءومىر ءسۇرۋ ساپاسىن جاقسارتۋ ءۇشىن جول كارتاسىن ىسكە اسىرۋ ارقىلى العا قويىلعان مىندەتتەردىڭ ۋاقىتىلى ورىندالۋىنا باقىلاۋدى كۇشەيتۋدى تاپسىردى.