الماتىنى باقشا-قالا رەتىندە قايتا جانداندىرۋ اياسىندا شامامەن 643 مىڭ كوشەت وتىرعىزىلدى. بۇل تۋرالى الماتى اكىمى ەربولات دوسايەۆ ورتالىق كوممۋنيكاسيالار قىزمەتىندە وتكەن بريفينگتە جۋرناليستەردىڭ سۇراعىنا جاۋاپ بەرۋ بارىسىندا مالىمدەدى، دەپ حابارلايدى aqshamnews.kz
«وتكەن جىلدىڭ قاڭتار ايىنان باستاپ جاسىل جەلەكتەردى كۇتۋ جانە وتىرعىزۋ بويىنشا جاڭا ەرەجەلەر ەنگىزىلدى، وندا ستاندارتتار وزگەرتىلدى. كوشەتتەردىڭ بيىكتىگى كەمىندە 2-2،5 مەتر بولۋى ءتيىس. كەلەسى جىلى ءبىز تاجىريبە رەتىندە بيىكتىگى 4-6 مەتر بولاتىن 27 مىڭ ءىرى اعاش وتىرعىزۋدى باستايمىز. بۇل قالاداعى جايلى ورتا قالىپتاستىرۋعا جانە كوشەتتەردىڭ جەرسىنۋ كورسەتكىشىن ارتتىرۋعا باعىتتالعان شارا. سەبەبى ءالسىز كوشەتتەر اگرەسسيۆتى قالالىق ورتادا ءومىر سۇرە المايدى»، – دەپ ءتۇسىندىردى ەربولات دوسايەۆ.
سونىمەن قاتار، جاڭا ەرەجەلەرگە سايكەس، مەردىگەر ۇيىمدار سۋارۋ جۇيەسىن ورناتىپ، كوشەتتەردى ءۇش جىل بويى كۇتىپ-باپتاۋعا مىندەتتى. «وسى شارالاردىڭ ارقاسىندا كوشەتتەردىڭ جەرسىنبەۋ دەڭگەيىن 30%-دان 10%-عا دەيىن تومەندەتۋ مۇمكىن بولدى»، – دەپ اتاپ ءوتتى قالا باسشىسى.
اكىمنىڭ ايتۋىنشا، سوڭعى ەكى جىلدا قالادا 500 شاقىرىم اۆتوسۋارۋ جانە تامشىلاتىپ سۋارۋ جۇيەسى ورناتىلدى. 2025 جىلعا دەيىن تاعى 290 شاقىرىم سۋارۋ جەلىسى سالىنىپ، بۇل ءبىر ميلليوننان استام اعاشقا ساپالى سۋارۋدى قامتاماسىز ەتەدى.
ەربولات دوسايەۆ، سونداي-اق، 2022 جىلى قالادا 84 مىڭ اپاتتى اعاش بولعانىن، ولاردىڭ 40،5 مىڭ داناسى كەسىلگەنىن، قالعان اپاتتى اعاشتاردى 2025-2026 جىلدارى كەسۋ جوسپارلانىپ وتىرعانىن ايتتى.
جالپى، الماتىدا 4،3 ميلليوننان استام جاسىل جەلەك بار، ونىڭ 2،3 ميلليونى جالپى پايدالانىمداعى جەرلەردە ورنالاسقان.